“Амини Гург”: кушта шудани даҳҳо нафар дар ҷангҳои Самангону Панҷшер

Ин талафот дар пайи амалиёте мешавад, ки толибон алайҳи нерӯҳои муқовимат дар ин ду вилоят анҷом додаанд.

Холид Аюбӣ, яке аз наздикони Аҷабхон, фармондеҳе дар Самангон, ба Sputnik Тоҷикистон гуфт, дар пайи як ҷанги чандрӯза дар соҳоти Тайхона, Тандӯрак, Оғопета, Анҷирак ва Қаршингови вилояти Самангон 37 узви толибон, ба шумули 12 ӯзбеку туркмани худи вилоят, кушта шудаанд.

“Нерӯҳои муқовимат низ талафоти зиёд доштанд. Дар ин ҷангҳо 8 сарбози мо кушта, 13 тани дигар захмӣ шудаанд. Захми аксари онҳо сабук аст ва таҳти тадовии духтурони ҷабҳа қарор доранд”, - гуфт Холид Аюбӣ.

Вай афзуд, дар оғози ҷангҳо дар куҳистоноти Самангон 5 гуруҳ ҳузур доштанд, аммо ҳоло теъдоди онҳо ба 13 гуруҳ расидааст, ки аз 10 то 70 сарбоз доранд.

“Ин гуруҳҳо аз Балху Бағлон ва Ғӯр худро ба соҳоти ҷанг расонидаанд. Чанд гуруҳи дигар низ бо мо дар тамос шуда, омодагии пайвастан бо моро карданд. Маъмулан касоне ба ҷабҳа мепайванданд, ки зиндагиашон таҳти султаи толибон дар хатар аст”, - гуфт Холид Аюбӣ.

Ду рӯзи қабл Мавлавӣ Ҳабибуллоҳ Ҳамос, фармондеҳи пулиси толибон барои Самангон, гуфт, ки афзоиши афроди муқовимат дар кӯҳҳои Самангон дар як ҷаласаи мақомоти амниятии вилоят ба баррасӣ гирифта ва қарор шуд, ки як амалиёти махфиёна алайҳи онон роҳандозӣ шавад.

“Муҷоҳидинро махфиёна он ҷо равон кардем. Дар қарияи Тайхона як нафари марбути муқовимат кушта, як тани дигар асир афтод ва яке ҳам рӯ ба фирор овард. Дар амалиёти ҷудогона дар Тандӯраку Оғопетаву Анҷирак се нафар, ба шумули як фармондеҳи муқовимат ба номи Неъмат кушта шуд. Мурдаҳояшон ҳоло дар шифохонаи Айбак аст. Чаҳор нафарро ҳам асир гирифтем”, - гуфт Мавлавӣ Ҳабибуллоҳ Ҳамос.

Гузоришҳо аз таҷаммуъи бештари нерӯҳо дар қаламравҳои таҳти идораи Ҷабҳаи муқовимати миллии Афғонистон аз вилояти Панҷшеру вулусволиҳои Андаробҳои вилояти Бағлон низ ба даст омадааст.

Бино ба онҳо, гуруҳҳои пароканда аз вилоятҳои Тахору Кундуз ва Бадахшон худро ба муқовиматгарон дар ин манотиқ мерасонанд. Яке аз онҳо Амини Бадахшонӣ, маъруф ба “Амини Гург” аст, ки бо ҳудуди 40 нафар ҷангиашро худро ба Панҷшер расондааст.

Ҳамзамон се гуруҳи дигар иборат аз ӯзбеку туркманҳои вилоятҳои Тахору Кундуз низ ба Андаробҳо омадаанд, ки аз фармондеҳонашон ба далоили амниятӣ ном бурда намешавад. Зоҳиран, таҷаммуъи нерӯҳои зиддитолиб дар манотиқи таҳти идораи нерӯҳои муқовимат толибонро маҷбур ба анҷоми амалиётҳои тасфиявӣ кардааст.

Манбаъи Sputnik Тоҷикистон дар Ҷабҳаи муқовимати миллии Афғонистон гуфт, толибон ду рӯзи қабл, 7 декабр, болои размандагони “Ҷабҳаи Холид ибни Валид” – и неруҳои Ҷабҳаи муқовамати миллии Афғонистон, воқеъ дар минтақаи Хоруи вулусволии Хинҷи вилояти Панҷшир аз чанд истиқомат лашкар кашиданд.

“Забеурраҳмон Муҷоҳид, фармондеҳи ин ҷабҳа, ба мо гузориш дод, ки ин ҳамла пас аз як даргирии шадид хотима ёфт ва толибон майдони ҷангро бо аҷала тарк карданд. Дар натиҷа 5 ҷангии толиб кушта шуд. Теъдоди захмиҳояшон маълум нест. Ба неруҳои ҷабҳаи мо ҳеҷ гуна осебе нарсид”, - гуфт манбаъ.

Ҷабҳаи муқовимати миллии Афғонистон таҳти раҳбарии Аҳмади Масъуд, ки моҳи август эъломи мавҷудият кард ва дар дараи Панҷшеру минтақаи Андаробҳо аввалин ҷангҳои худ алайҳи толибонро аввали моҳи сентябр оғоз намуд, ҳоло дар вилоятҳои Самангон ва Кописо низ ҷабҳа боз кардааст.

Масъулини Ҷабҳа мегӯянд, таҳаррукоте, назири камин ва ҳамлаҳои чирикӣ аз сӯи муқовиматгарон дар чандин вилояти дигар созмондеҳӣ ва иҷро шудаанд, аммо Ҷабҳа бино ба бархе мулоҳизаҳо онҳоро расонаӣ намекунад.

Сарчашма:sputnik-tj.com