Порлумон тасдиқ кард: Тоҷикистон ба бандари “Туркманбошӣ” роҳ меёбад

Порлумони Тоҷикистон дар ҷаласаи рӯзи 24-уми январияш Созишнома миёни Тоҷикистон ва Туркманистон дар бораи ҳамкорӣ дар соҳаи нақлиёти роҳи оҳанро тасдиқ кард.

Дар ин бора сахагӯӣ Маҷлиси намояндагон Муҳаммадато Султонов хабар медиҳад.

Ба иттилои манбаъ, тасдиқ гардидани созишномаи мазкур ба баланд бардоштани сатҳи хизматрасонии байналмилалии ҳамлу нақл, содирот, воридот ва транзити бор бо нақлиёти роҳи оҳан миёни Тоҷикистон ва Туркманистон, таҳкими ҳамкории дуҷониба, зиёд гардидани гардиши молу маҳсулот миёни ҳарду кишвар мусоидат мекунад.

Гуфта мешавад, Тоҷикистон бо истифода аз роҳҳои оҳани транзитӣ ва бандари обии "Туркманбошӣ"-и Туркманистон тавассути Баҳри Каспий баромадан ба роҳҳои оҳани дигар кишварҳои Аврупо, инчунин барои ноил гардидан ба яке аз ҳадафҳои стратегии мамлакат –раҳоӣ аз бунбасти коммуникатсионӣ дастёб мешавад

Ёдовар мешавем, ин созишнома зимни сафари Эмомалӣ Раҳмон, раисиҷумҳури Тоҷикистон ба Ашхобод моҳи августи соли 2021 ҳосил шуда буд.

Дар ҳоле, ки Туркманистон солҳои охир мошину қаторҳои борбари Тоҷикистонро роҳ намедод ва дар ин масир мушкилиҳо ҷой дошт.

Дар ин сафар ва дидори Раҳмон бо ҳамтои туркманаш Қурбонгулӣ Бердимуҳаммадов таъкид гардида буд, ки баҳрабардорӣ аз имконоти васеи соҳаҳои саноат, нақлиёт, ташкили мусофиркашонӣ дар роҳи оҳан ва хатсайрҳои ҳавоӣ, ташкил ва боло бурдани ҳаҷми ҳамлу нақли байналмилалии боркашонӣ бо мошин ва роҳи оҳан тавассути қаламрави Туркманистон, истифодаи бандари байналмилалии баҳрии “Туркманбошӣ” ҳамчун маркази логистикии борҳои транзитии Тоҷикистон, ба манфиати ҳарду ҷониб хоҳад буд.

Ҳамкориҳо кишварҳо дар умури роҳу нақлиёт дар ҳолест, ки Туркманистон аз соли 2019 ба далоили номаълум борҳои самти Тоҷикистонро ба қаламраваш роҳ намедод. Мақомоти туркман далели ин иқдомро ба масоили амниятӣ рабт медоданд, аммо ҷузъиётро ироа намекарданд.