Раҳмон тасдиқ кард, ки Амриддин Аловатшоев дар Душанбест

Юсуф Раҳмон, додситони кулли Тоҷикистон таъйид намуд, ки Амриддин Аловатшоев дар боздошт дар шаҳри Душанбе қарор дорад. Аловатшоев, ки яке аз роҳбарони ҷавонони Вилояти мухтори куҳистони Бадахшон дар Русия муаррифӣ мешавад, даҳаи дуюми моҳи январ дар Русия боздошт гардид.

Дар ҳоле ки наздиконаш аз истирдоди Аловатшоев ба Душанбе хабар медоданд, расман мақомоти Тоҷикистон инро шарҳ намедоданд.

Юсуф Раҳмон истирдоди Аловатшоевро таъйид намуда, изҳор дошт, ки ӯ ҳанӯз аз соли 2018-ум мавриди пайгард қарор дошт. Аммо тафсилоти иттиҳомот алайҳи ӯро ироа накард.

Аловатшоеви 44-сола, зодаи Роштқалъа буда, аз роҳбарони зодагони ин ноҳия дар Русия муаррифӣ мешуд. Ӯ асосан дар Русия зиндагӣ мекард ва ба гуфтаи наздиконаш дар яке аз ширкатҳои муҳофизатӣ фаъолият дошт.

Амриддин Аловатшоевро аз ҷумлаи нафароне мегӯянд, ки дар пайи нооромиҳои моҳи ноябри соли 2021 дар Хоруғ ба назди сафорати Тоҷикистон дар Маскав ҳозир шуд ва бо сафир дар Русия барои ҳалли қазия мулоқот анҷом доданд.

Ин дар ҳолест, ки Ситоди байниидоравии таъмини амният дар ВМКБ соли 2018-ум дар феҳрасти "саркардагони гуруҳҳои ҷиноӣ"-и шаҳри Хоруғ ва навоҳии Шуғнону Роштқалъа 7 нафарро ном бурда, иттилоъ дод, ки ба ҳар яки онҳо огоҳии расмӣ дода шуд ва онҳо протоколи расмиро шахсан имзо намуданд.

Манбаъ изҳор дошта буд, ки аз шаҳрвандони зикршуда талаб карда шуд, ки аз ташкилу роҳбарии гуруҳҳои ҷиноӣ, даъвати ҷавонон ба бетартибиҳо, ғасби иншооти давлатӣ, таҳқири намояндагони ҳокимият, гардиши силоҳ, маводи мухаддир, аъмоли ғайриқонунӣ бар зидди амнияти ҷомеа худдорӣ кунанд.