Оҷонсии назорат дар соҳаи маориф: Мактаби “Сомониён”-и афғонистониҳо бе иҷозатнома фаъолият дорад

“Сомониён” - ягона мактаби муҳоҷирону паноҳандагони Афғонистон дар Тоҷикитон бидуни иҷозатнома фаъолият дорад. Дар ин бора Муҳаммадтоир Саидзода, раҳбари Оҷонсии назорат дар соҳаи маорифи Тоҷикистон рӯзи 31-уми июл дар нишасти матбуотӣ хабар дод.

Ӯ гуфт, вобаста ба мактаби “Сомониён” бо Зоҳир Ағбар, сафири Афғонистон дар Тоҷикистон мулоқот доштааст.

“Дар он вохӯрӣ дар мавриди ҳалли баъзе масъалаҳо пешниҳод додем. Дар асоси он мувофиқае, ки ба даст оварда будем, онҳо бояд ба Агентӣ барои гирифтани иҷозатнома муроҷиат мекарданд, вале дигар муроҷиат накарданд. Аммо барои дарёфти иҷозатномаи идомаи фаъолияти мактаб бояд муроҷиат кунанд”, - изҳор дошт Саидзода.

Роҳбари Оҷонсии назорат дар соҳаи маориф дар нишасти матбуотии нимаи соли 2024 гуфта буд, барои ҳалли ин мушкилӣ онҳо ба сафир пешниҳод кардаанд, ки кори муассиса дар доираи талаботи стандартҳои давлатии таҳсилоти Тоҷикистон ба роҳ монда шавад. Аммо ба гуфтаи ӯ, ҷониби сафорат дар ин маврид то ҳол ба мувофиқа нарасидааст.

Директори Оҷонсии назорат дар соҳаи маориф яке аз мушкилиҳои дигари мактаби мазкурро ба санадҳои меъёриву ҳуқуқие, ки бояд пешниҳод шаванд, рабт дода буд.

Бояд гуфт, муҳлати иҷозатномаи фаъолияти мактаби “Сомонииён” , 17-уми октябри соли 2024 ба охир расида буд. Чанд ҳафта қабл аз анҷоми иҷозатномаи кори ин мактаб Зоҳир Ағбар дар суҳбат изҳори боварӣ карда буд, ки иҷозатномаи фаъолияти мактаб тамдид мешавад.

Он замон ӯ барои тамдиди фаъолияти ягона мактаби муҳоҷирон ва паноҳандагони афғонистонӣ дар кишвари мо ба Вазорати маориф ва илми Тоҷикистон рафта буд. Зоҳири Ағбар баъди мулоқот бо намояндаҳои ин ниҳод гуфта буд, масъулини Вазорати маорифи Тоҷикистон ваъда додаанд, ки дар ин масъала бо сафорати Афғонистон ҳамкориҳои лозимиро анҷом хоҳанд дод.

Он вақт аз Вазорати маориф ва илм гуфта буданд, ки ҳамаи масъалаҳои дар рафти вохӯрӣ баррасигардида таклифу пешниҳодҳо буданд. Дар ин ниҳод ба сафири Афғонистон гуфтаанд, ки пешниҳодҳои онҳоро Вазорати корҳои хориҷии Тоҷикистон (ВКХ) баррасӣ карда, баъдан ба Вазорати маориф ва илм мактуб пешниҳод мекунад.

“Дар сурати розигии ВКХ Вазорати маориф ва илм метавонад, ки доир ба ин масъала корбарӣ кунад”, - гуфта буданд аз Вазорати маориф ва илм.

Аммо он замон аз ВКХ посух доданд, ки масъули ҳалли ин масъала Вазорати маориф ва илм аст.


Мактаби “Сомониён” соли 2001 дар Душанбе таъсис ёфт. Дар ин мактаб то замони қудратро ба даст гирифтани “Толибон”* дар Афғонистон фарзандони муҳоҷирону паноҳандагони ин кишвар таълим мегирифтанд. Худи мактаб бошад, мувофиқи меъёри Вазорати маорифи Афғонистон фаъолият мекард. Ҳамчунин, пули иҷораи мактабро ин вазорат пардохт мекард.

Аммо пас аз дубора ба қудрат баргаштани “Толибон” мактаби мазкур ба мушкилоти молиявӣ дучор шуд. Маблағи иҷораи онро Сафорати Амрико дар Тоҷикистон то моҳи феврали соли 2024 пардохта буд.

Баъди он мактаб ба далели қарздорӣ аз соҳибмулки бинои қаблиаш– Ҷамъияти саҳҳомии “Равғани тоҷик” ба бинои Сафорати Афғонистон кӯчид.

Ноҷия Зоҳир, мудири мактаби мазкур гуфта буд, ки ин мактаб 11 ҳазор доллари амрикоӣ қарздор аст. Зоҳир Ағбар ваъда дода буд, ки қарзи мактаб пеши соҳибмулки қаблӣ ҳал хоҳад шуд.

То кунун толибилмони ин мактаб дар бинои Сафорати Афғонистон, ки пас аз суқути низоми ҷумҳурият дар ин кишвар дар тобистони соли 2021 ба таври пурра фаъолият надошт, таҳсили худро идома медиҳанд.

Зоҳир Ағбар қаблан гуфта буд, ки давлати Тоҷикистон ваъда кардааст, барои мактаб ҷойи мушаххасеро ҷудо мекунанд. Аммо, ба гуфтаи сафир, ин кор вақт мехоҳад. Вале бо гузашти беш аз як сол тақдири ин мактаб норӯшан боқӣ мемонад.

*Дар Тоҷикистон гурӯҳи террористӣ эътироф шудааст.