Ихтиёрӣ ё "облава"? Омӯзгоронро аз дарс ба хидмати ҳарбӣ бурдаанд

Омӯзгорони муассисаи таҳсилоти миёнаи умумии № 7-и ноҳияи Деваштич дар бораи ба хидмат бурдани ду омӯзгори ин мактаб хабар доданд. Муаллимонро замоне ба хидмат бурдаанд, ки онҳо ба хонандаҳои мактаб дарс мегуфтанд.

Бино ба гуфтаи муаллимони ин мактаб, рӯзи ҷумъаи 26 ноябр, кормандони комиссариати ҳарбӣ ва чанд нафари дигар бо либоси мулкӣ ба мактаби № 7 омада, ду омӯзгорро ба хидмат бурдаанд.

“Онҳо бо баҳонаи иштирок дар маҷлиси ҷамоат омӯзгорон - Санҷар Ёров ва Фирдавс Бобоевро, ки яке забони англисӣ ва дуюмӣ информатикаро дарс медод, ба ҷамоат бурда, аз он ҷо ба ноҳия ва баъдан ба комиссариати ҳарбии Суғд бурданд”, - гуфт яке аз омӯзгорон ба Sputnik Тоҷикистон.

Бино ба иттилоъи манбаъ, он рӯз ҳамроҳи ин ду омӯзгор Зикрилло Юсупов ном як омӯзгори дигар ҳам будааст, ки то бинои комиссариати ноҳияи Деваштич бурда шудааст. Танҳо баъди дидани он, ки ин муаллими ҷавон, чанд дафъа ҷарроҳиро паси сар намудааст, аз он ҷо раҳо кардаанд.

Омӯзгорони ҷалбшуда ба хидмат ба ҳамкорони худ иброз доштаанд, ки дар бинои комиссариати ҳарбӣ аз онҳо барои ду аризаи қаблан омодашуда, яке аризаи бо хоҳиши худ аз кор рафтан ва дигаре барои бо хоҳиши худ ба хидмат рафтан мебошад, иҷборан имзоро гирифтаанд.

Муаллимони мактаби № 7-и деҳаи Басмандаи ноҳияи Деваштич мегӯянд, иҷборан ба хизмат бурдани омӯзгорон дар ҳолест, ки ҳоло норасоии муаллимони соҳибтахассус мушкили рақами аввали макотиб дар деҳот ба ҳисоб меравад.

"Барои мисол тибқи ҷадвал, 54 соат дарси забони англисӣ дар як ҳафтаро ду омӯзгор мегузаронданд. Ҳоло баъди ба артиш бурдани Санҷар Ёров 54 соати дарсиро як омӯзгор ба иҷро расонида наметавонад. Ҳоло ҷадвали тартибдодаи дарсӣ вайрон шуд”, - гуфт омӯзгори мактаб.

Манобеъ ҳамчунин гуфтанд, ки аз дигар макотиби ин ноҳия низ омӯзгорони ҷавон ва волидони онҳоро масъулони комиссияи даъвати ҳарбӣ ба назди худ даъват намудаанд.

Бино ба иттилоъи дарёфтӣ соли ҷорӣ ба фарқ аз солҳои қаблӣ ҳудуди 800 наваскар ба нақшаи даъвати ҳарбии вилояти Суғд зам карда шудааст.

Дар пайи зиёд шудани нақшаи сафарбарии наваскарон, рӯзҳои охир дар шабакаҳои иҷтимоӣ мавзуъи “облава” ё ҷалби иҷбории ҷавонон ба хидмати ҳарбӣ аз ҳар вақти дигар дида доғтар шудааст.

Ду рӯз қабл корбарони шабакаҳои иҷтимоӣ ба нақл аз қавли волидон дар бораи "облава"-и донишҷӯёни донишкада ва коллеҷи шаҳри Панҷакент хабар нашр намуданд.

Умрӣ Кенҷаев, падари яке аз донишҷӯёни шаҳри Панҷакент иброз намудааст, ки писараш дар курси якум таҳсил мекард, аммо ӯро иҷборан ба хидмат бурдаанд.

“Дарсба даромада писарам Ансориро бо се ҳамкурсаш ба зурӣ гирифта бурдаанд. Ӯ курси якум дар гурӯҳи шартномавӣ таҳсил мекард. Ман барои шикоят ба донишгоҳ рафтам, лекин ба ман гуфтанд, ки Ансорӣ бемор асту дарсба нест, баъдтар маълум шуд, ки ба комиссариат бурдаанд”- гила дорад Кенҷаев.

Маъракаи даъвати ҷавонон ба хизмати ҳарбӣ дар Тоҷикистон ҳамасола дар фасли баҳору тирамоҳ амалӣ шуда, масъулин бисёр ба шеваи ғайриқонунии сарбозгирӣ ё худ "облава" даст мезананд. Қаблан Эмомалӣ Раҳмон, раисиҷумҳури Тоҷикистон, дар мавзӯъи ҷалби ҷавонон ба хизмат гуфт, ки дар ин росто қабл аз ҳама писарони фарзандони мансабдорони давлатӣ бояд намунаи ибрат бошанд.

Дар маъракаи даъвати тирамоҳии имсол ҷавонони сину солашон 1994-2003, ки ҳуқуқи ба таъхир ва ё озодшавӣ аз хидматро надоранд, ба артиш ҷалб мешаванд.

Сарчвшма:sputnik-tj.com