Падару писар кӯдакистони рӯси - англисизабони "Табассуми офтобак"- ро ифтитоҳ намуданд

Бар хабари дафтари матбуоти раисҷумҳури Тоҷикистон, аснои кушодашавии ин муассиса ба Эмомалӣ Раҳмон иттилоъ доданд, ки иншоот аз се ошёна ва таҳхона иборат буда, барои 300 нафар кӯдакон дар як баст пешбинӣ гардидааст.

Гуфта мешавад, кӯдакистон аз тарафи соҳибкорони ватанӣ, оилаи Табаралиевҳо сохташудаастбо тамоми шароити зарурӣ муҷаҳҳаз гардонида шудаст.

Маврид ба зикр аст, ки таълиму тарбия дар ин кӯдакистони хусусӣ бо забонҳои русӣ ва англисӣ ба роҳ монда шуда, наздики 60 нафар бо ҷойи кори доимӣ таъмин гардидаанд.

Дар муассиса барои рушди зеҳнии кӯдакон маҳфилҳои расмкашӣ, кулолгарӣ ва хореография созмон дода шуда, ҷиҳати рушди ҷисмонии онҳо бошад, машғулиятҳои шиноварӣ ва гимнастикаи солимгардонӣ ба роҳ монда шудааст.

Кӯдакистон ҳамзамон дорои нуқтаи тиббӣ, ошхона, толори мусиқӣ, ҳуҷраи методӣ, кинотеатр, утоқҳои коргарону роҳбарон ва дигар нуқтаҳои хизматрасонӣ мебошад. Дар таҳхонаи бино ҳавзи шиноварии зимистона, таҷҳизоти барқӣ ва дигар шароити маишӣ ҷойгиранд.

Сарвари давлат муҳтарам Эмомалӣ Раҳмон бо кӯдакони ин даргоҳи маърифат суҳбати озоду самимӣ анҷом дода, ба онҳо тӯҳфаҳо тақдим намуданд.