Сафири нави Тоҷикистон дар Ҳиндустон эътимодномаашро ба Нагеш Сингҳ супорид

Сафири тозатаъини Тоҷикистон дар Ҳиндустон нусхаи эътимодномаашро ба сардори Ташрифоти Вазорати корҳои хориҷии Ҳиндустон супорид

 Рӯзи 6 июни 2019 сафири Ҷумҳурии Тоҷикистон дар Ҳиндустон Султон Раҳимзода нусхаи эътимодномаро ба Сардори Ташрифоти Вазорати корҳои хориҷии Ҳиндустон Нагеш Сингҳ супорид.

Дар ин бора равобити умумии Вазорати умури хориҷаи Тоҷикистон хабар медиҳад.

Гуфта мешавад, ки дар вохӯрӣ ҷонибҳо масъалаҳои ҳамкориҳои дуҷониба байни Тоҷикистону Ҳиндустонро баррасӣ намуданд.

Ёдовар мешавем, ки Раҳимзода Султон Нурмаҳмадпур моҳи май бо қарори ҳукумат, аз вазифаи муовини якуми вазири энергетика ва захираҳои оби Тоҷикистон озод карда шуда, бо фармони Эмомалӣ Раҳмон ба мақоми сафири Тоҷикистон дар Ҳиндустон таъин гардид.

Пештар хабар дода шуд, ки раисиҷумҳури Тоҷикистон ба сафири Тоҷикистон дар Қазоқистон вазифаи нав дод.