Банаворгирии филми “Хуршед ва Моҳ” ба охир расид. Он аз чӣ қисса мекунад ва кай намоиш дода мешавад?

Дар Тоҷикистон наворбардории филми нави ҳунарӣ бо номи «Хуршед ва Моҳ» ба анҷом расид ва ба наздикӣ намоиш дода мешавад. Дар ин бора Манзаралӣ Шералӣ, коргардон ва муаллифи филмнома ба «Азия-Плюс» хабар дод.
Ба гуфтаи коргардон, филм маҳсули ҳамкории муштараки  «Тоҷикфилм» ва ширкати филофарии «Зардил» мебошад. Ин нахустин лоиҳаи синамоии «Зардил» мебошад, ки бо мақсади пешниҳоди асари ҷолиб ва рушди синамои муосир таъсис ёфтааст.

Қиссаи ишқи ноком

Филм дар сабки драмаи отифиву шоирона офарида шуда, ба гуфтаи коргардон, пур аз таронаҳои эҳсосӣ мебошад. Номи филм рамзӣ буда, аз номи қаҳрамонҳои асосӣ — Хуршед ва Моҳ гирифта шудааст.
        

»Мардум мегӯянд, ки ҳаргиз хуршед ва моҳ ба ҳам намерасанд. Ишқи қаҳрамонҳои мо низ мисли қиссаҳои классикии Лайливу Маҷнун, Фарҳоду Ширин ва Юсуфу Зулайхо, як ишқи ноком асту ба ҳам намерасанд. Ишқи онҳо муддате танҳо аз паси шишаҳо — бо навиштани паёмҳо дар шишаи мошин ва тиреза давом мекунад ва аз ин муҳаббат танҳо як амонат боқӣ мемонад, ки қаҳрамон баъдан дунболи он мегардад», — изҳор дошт Манзаралӣ Шералӣ.

         Коргардон афзуд, ки дар филм муаммоҳо ва сужаҳои дигари ҷолиб низ ҷой доранд. Аз ҷумла, омадани Хуршед баъди 18–20 сол ба Душанбе барои ҷӯё шудани падараш ва мушкилоту тағйироте, ки як ҷавони деҳотӣ дар пойтахт ба онҳо рӯ ба рӯ мешавад, аз хатҳои дигари сюжети филм мебошанд.
        

            

                                                            

                                            

                                            

                                                     "                 "             

                        

                                                                                                                                                                                                                                                                                                                                                                          

                                                                                                                                                                                                                             

Ҳунарпешагон ва раванди интихоби нақшҳоКоргардон таъкид кард, ки нақши Хуршед аз ҷониби Ризо Юсуфӣ, ҳунарпешаи Театри академӣ-драмавии ба номи А. Лоҳутӣ ва нақши Моҳ аз ҷониби Соро Саидкамолӣ, блогери ҷавон, ки хатмкардаи Донишкадаи ҳунарҳои зебои Тоҷикистон аст, офарида шудаанд.

Дар филм, ҳамчунин ҳунармандони ботаҷриба, аз қабили Асалбек Назрӣ, Султонмурод Бобомуродов, Парвиз Пӯлодӣ, Ҳотами Равшан ва дигарон нақш офаридаанд.
Барои мусиқии (саундтрек)-и филм, шеърии Фурқати Низом, шоири ҷавон интихоб гардидаааст, ки интизор меравад онро Умедҷони Бурҳон, сарояндаи ҷавон иҷро кунад.
                         

            

                                                            

                                            

                                            

                                            

                                                     "                 "             

                        

                                                                       

         Аз ин пеш, Манзаралӣ Шералӣ соли 2020 филми кӯтоҳи «Сарбор"-ро сабт карда буд. Он достони як зани ҷавонест, ки аз хонаи шавҳар ронда шуда, волидонаш ӯро қабул намекунанд. Иҷрокунандагони нақши асосӣ Абдукарим Машрабов ва Саодат Сафарова мебошанд.
»Сарбор» дар синамоҷашнвораи 13-уми байналмилалии «Гавҳари роҳи абрешим» дар шаҳри Тошканд беҳтарин филм дониста шуд. Ғайр аз ин дар чандин ҷашнвораҳои байналмилалӣ соҳиби ҷоиза гардидааст.
Баъдан, филми «Дар талоши ҳақиқат"-и ӯ, ки дар якҷоягӣ бо Некрӯз Ҷалилиён, коргардони ҷавони дигар баҳсбарангез шуд. Аз ҷумла, Ҷалилиён навишт, ки филми «Дар талоши ҳақиқат"-ро ӯ ба навор бардоштааст ва аз ҷониби Маҳмадсаид Шоҳиён — директори «Тоҷикфилм» филми мазкур зери сензура қарор гирифта, чандин қисматаш «бурида» шудааст.
Дертар Маҳмадсаид Шоҳиён ин нуктаро рад карда гуфта буд, ки дар филми «Дар талоши ҳақиқат» ҷойҳое, ки «қайчӣ зада шуд», ба хотири маҳдудияти вақт буд. «Тоҷикфилм» Манзаралӣ Шералиро коргардони филми мазкур муаррифӣ карда буд.


Сарчашма: asiaplus.news