Дар Душанбе оромгоҳҳои кӯҳнаро тахриб карда, ҷасадҳоро ба қабристонҳои дигар мекӯчонанд

Дар Душанбе оромгоҳҳо ё қабристонҳои куҳнаро, ки аксарашон аз асри 20-ум боқӣ мондаанд, тахриб ва ҷасадҳо ба қабристонҳои дигар кӯчонида мешаванд. Имсол аллакай, ду оромгоҳро кӯчониданд ва дар ҷойи яке масҷид ва дар дигараш бинои нави фурудгоҳи байналмилалии Душанбе бунёд мешавад.

Бахтиёр Шарифӣ, муовини якуми шаҳрдори Душанбе рӯзи 17-уми июл зимни нишасти матбуотӣ гуфт, ки бо назардошти зиёд шудани масоҳати пойтахт, ба талабот мутобиқ кардани роҳу пӯл ва сохтмонҳои иҷтимоӣ, тасмими тахриби оромгоҳҳо гирифта мешаванд.
Ӯ бо тасдиқи тахрибу кӯчонидани ду оромгоҳ дар моҳҳои март-апрел афзуд, ки тибқи нақшаи генералӣ дар оянда боз чанд оромгоҳро мекӯчонанд. Вале мушаххас нагуфт, ки чанд оромгоҳ ва дар кадом маҳаллаҳо кӯчонида мешавад.
                                    "                                          

«Як миқдор қабристонҳое, ки аз асри бист мондагӣ ҳастанд, дигар дар он ҷо ягон кас дафн карда намешавад, бо дар назардошти риояи талаботи санитарию беҳдоштӣ ва ҳамзамон урфу одатҳои мусулмонӣ дар мувофиқа бо соҳибони ин қабрҳо, ин корро (тахрибу кӯчонидан) амалӣ мекунем. Корро ширкате анҷом медиҳад, ки таҷрибаи бой дорад… Мо наметавонем гӯем, ки ин озод аст, касе хоҳад, майити худашро худаш бурда гӯр мекунад, не ин хел нест», — изҳор дошт номбурда.

                                         
Дар ҳамин ҳол Толиб Раҳимзода, муовини шаҳрдори Душанбе рӯзи 17-уми июл зимни нишасти матбуотӣ афзуд, ки соли ҷорӣ тибқи нақшаи кулли шаҳдорӣ, ду оромгоҳро ба оромгоҳи «Меҳробод"-и ноҳияи Сино кӯчониданд.
                                    "                                          

«Он майитҳое, ки мо аз маҳаллаи Ҳалқаҷари ноҳияи Шоҳмансур кӯчонидем, 1345 ҷасад бо риояи талаботи беҳдоштӣ ба қабристони „Меҳробод"-и ноҳияи Сино кӯчонида  шуд. Минбаъд низ он қабристонҳое, ки 100 ё 120 сол пеш дар ҳудуди шаҳр вуҷуд доранд ва беному нишонанд ба оромгоҳи «Меҳробод"-и ноҳияи Сино, бо масоҳати 74 гектар, ҷойгир карда мешаванд«, — таъкид кард Раҳимзода.

                                         
 Дар ҳамин ҳол, замоне, ки оромгоҳи маҳаллаи Ҳаёти нави ноҳияи Сино ва маҳаллаи Ҳалқаҷари ноҳияи Шоҳмансурро тахриб карданд, мушоҳида мешуд, ки меъёрҳои беҳдоштӣ риоя намешавад.
Он вақт мушоҳидаи хабарнигори „Азия-Плюс“ дар ин ду оромгоҳ маълум кард, ки худи сокинон ба кандани қабрҳо ва берун овардани ҷасадҳо машғуланд. Сокиноне, ки ба кандани қабрҳо машғул буданд, ниқоб ва теъдоде аз онҳо ҳатто дастпӯш надоштанд.
Қаблан, аз Раёсати оромгоҳҳои шаҳри душанбе ба мо гуфта буданд, ки кӯчонидани ҷасадҳо дастаҷамъона бо сокинони маҳаллаҳо ва мувофиқи тартиботи дини ислом сурат гирифт. Гузориши моро аз тахриби ин ду оромгоҳ бештар дар ин пайванд тамошо кунед.
                                                                   
 Мувофиқи қарори ҳукумат „Дар бораи тартиби нигоҳдорӣ ва истифодабарии қабристонҳо“, ки соли 2017 тасдиқ шудааст, истифодаи ҳудуди қабристонҳое, ки маҳкам карда шудаанд, баъд аз 40 сол аз рӯзи маҳкамкунии онҳо иҷозат дода мешавад. Вале ба гуфтаи сокинони маҳаллаи Ҳалқаҷар, охирин майит дар ин оромгоҳ ҳамагӣ чанд моҳ пеш ба хок супорида шуда буд. Оромгоҳи маҳаллаи Ҳаёти Нав низ ҳарчанд, соли 2006 маҳкам шуда бошад, вале дар солҳои оянда низ чанд мурдаеро онҷо гурондаанд.                                                              
Масъулини шаҳрдории Душанбе то кунун сабаби риоя нашудани меъёри мазкурро шарҳ надодаанд.
Дар Душанбе чанд оромгоҳ мавҷуд аст?Аз Раёсати оромгоҳҳои шаҳри Душанбе ба „Азия-Плюс“ иттилоъ доданд, ки дар ҳудуди пойтахт 55 оромгоҳ мавҷуд буда, аз ин шумора ҳамагӣ дар 38 оромгоҳ иҷозаи гӯронидани ҷасадҳо дода мешавад. Дар 17 оромгоҳи дигар гӯронидани ҷасадҳо манъ аст.
Дар баргаҳои мо бинед, ки оромгоҳҳое, ки дар он ҷасад гӯронида мешавад, дар куҷо ҷойгиранд:
                                                                                                 
Сарчашма: asiaplus.news