Имсол 100 донишомӯз мактабҳои Тоҷикистонро бо гувоҳномаи аъло ва медалҳои тиллову нуқра хатм кардаанд. Барои дарёфти гувоҳномава медалҳо 139 хонанда бо ҳам рақобат карданд.
Дар ин бора аз Вазорати маориф ва илми Тоҷикистон имрӯз, 4-уми август ба “Азия-Плюс” иттилоъ доданд. Ба қавли манбаъ, имсол барои дарёфти гувоҳномаи аъло ва медалҳо аз ҷониби шуъбаҳои маорифи шаҳру навоҳии кишвар 178 хонанда пешниҳод шуд, вале ба озмун 139 кас роҳ ёфтанд, ки 100 тани онҳо ғолиб шуданд. Маълум нест, ки ғолибон аз кадом шаҳру ноҳияҳои Тоҷикистон ҳастанд. Аз вазорат гуфтанд, ки омори мазкур ҳисоб карда мешавад. Тибқи маълумоти Сарраёсати маорифи шаҳри Душанбе, хонандагони макотиби ноҳияи Шоҳмансури пойтахт – 13 медали тилло, ноҳияи Исмоили Сомонӣ – 6 медали тилло, ноҳияи Фирдавсӣ – 5 медали тилло ва ноҳияи Сино – 4 медали тилло ба даст оварданд.
Соҳибони гувоҳномаи аъло бо вазири маориф ва илми кишвар. Вазорати маориф ва илм Бояд гуфт, ки рӯзи 30-юми июл дар Душанбе маросими ҷамъбастии озмуни дарёфти гувоҳномаи аъло ва медалҳои тиллову нуқра барои хонандагон ҷамъбаст шуд.
Дар озмун аз шаҳри Душанбе 36 кас, вилояти Хатлон 61 кас, вилояти Суғд 27 кас, Вилояти Мухтори Кӯҳистони Бадахшон 9 кас ва шаҳру ноҳияҳои тобеи ҷумҳурӣ 6 тан иштирок карданд.
Тибқи иттилои Вазорати маориф ва илми кишвар, соли 2025-ум 73 хонанда гувоҳномаи аъло ва медали тиллову нуқра ба даст оварда буданд.
Комментарии (0)