Аврупо марзҳои Тоҷикистонро бо Афғонистон тақвият мекунад

 Президенти Тоҷикистон Эмомалӣ Раҳмон ва намояндаи олии Иттиҳоди Аврупо дар умури хориҷа ва сиёсати амният Ҷозеп Боррелл барои таҳкими марзи Тоҷикистон бо Афғонистон ба мувофиқа расиданд. Дар ин бора хадамоти матбуоти сарвари давлат гузориш медиҳад.

Иштироккунандагони музокироти Брюссел ба таҳкими амният дар Афғонистон, Тоҷикистон ва дар саросари Осиёи Марказӣ тамаркуз карданд.

"Эмомалӣ Раҳмон ва Ҷозеп Боррел ба талошҳои муштараки босамари ҷонибҳо дар ин самт, бахусус тақвияти ҳифзи сарҳади Тоҷикистону Афғонистон таъкид карданд", - хабар медиҳад дафтари матбуоти раисҷумҳури кишвар.

Боррелл ишора кард, ки ИА ба таҳкими робитаҳои минтақавӣ манфиатдор аст. Рушди ҳамкориҳо ба яке аз мавзӯъҳои нишасти қарибулвуқӯъи вазирони хориҷаи G5 + 1 дар Душанбе табдил хоҳад ёфт.

Илова бар ин, иштирокчиёни чорабинӣ натиҷаҳои мусбати ҳамкорӣ дар бахши энергетикаро қайд карданд.

"Барои таҳкими робитаҳо, иҷрои созишномаи шарикӣ байни Тоҷикистон ва Иттиҳоди Аврупо, инчунин пайвастани ҷумҳурӣ ба системаи имтиёзҳои гумрукӣ барои содирот ба Аврупо зарур аст", - таъкид шудааст зимни мулоқот.

Раҳмон ба Иттиҳоди Аврупо ва аъзои он барои дастгирии ташаббусҳои ҷаҳонии Тоҷикистон оид ба об изҳори сипос кард.

Дар навбати худ, Боррелл нақши муҳими ҷониби Тоҷикистонро дар ҳалли мушкилоти об ва рафъи оқибатҳои тағирёбии иқлим баланд арзёбӣ кард.

Сарчашма:sputnik-tj.com