Нописандии мансабдорон ба вакилон: Зуҳуров гуфт, ба Президент мерасонад
Зайнуддин Сафаров, вакили Маҷлиси намояндагони Тоҷикистон аз ҳавзаи Восеъ аз нописандии бархе аз мансабдорони вазоратҳо гила кард, ки нисбати намояндагони мардумӣ беаҳамиятӣ мекунанд
Сафаров ҳафтаи равон дар ҷаласаи палатаи поёнии парлумон зимни баррасии масъалаи роҳҳо гуфт, вақте ҳамчун вакил ба Вазорати нақлиёт муроҷиат мекунем, ки роҳҳо аз ҳисоби зиёд бор гирифтани автомобилҳо вайрон шудаанд, аҳамият намедиҳанд.
“Аз таъмири роҳи Данғара — Кангурт се-чор сол нагузашта, аллакай таъмирталаб шудааст. Воқеан, ба ин масъала бояд ҷиддӣ муносибат кард”, - изҳор дошт вакили мардумӣ.
Шукурҷон Зуҳуров, раиси Маҷлиси намояндагони Тоҷикистон дар пайи шикояти вакили мардумӣ даъват кард, ки ӯро аз ҳар ҳолати беаҳамиятии мансабдорони мақомоти Ҳукумат огоҳ кунанд. Зуҳуров ҳушдор дод, ки аз ҳолатҳои беаҳамиятии мақомдорон нисбати вакилон Эмомалӣ Раҳмон, раисиҷумҳури Тоҷикистонро огоҳ хоҳад кард ва алайҳи чунин афрод чораҷӯӣ хоҳад шуд.
“Шумо расман муроҷиат кунед ва нусхаи онро ба ман равон намоед. Дар навбати худ мо онро ба Роҳбари давлат пешниҳод хоҳем кард, то нисбат ба масъулини вазорату идораҳое, ки ба дархостҳои вакилӣ бетафовутӣ зоҳир менамоянд, чораҷӯӣ шавад”, - навиштааст нашрияи парлумонии “Садои мардум” аз қавли Зуҳуров.
Таъкид ба бетаваҷҷуҳии бархе аз ниҳодҳои давлатӣ ба дархостҳои вакилон дар ҳолест, ки бархе дар Тоҷикистон намояндагони мардумиро ба камфаъолиятӣ муттаҳам карда, нақши парлумон дар тасмимгириҳои муҳим дар кишвар камранг арзёбӣ мекунанд.
Комментарии (0)