Россия паспортига эга ўзбекистонлик сайёҳлар Мексикага киритилмади

Мексиканинг Канкун курорт шаҳрига Россия паспортига эга 14 кишининг киришига рухсат берилмади. Бу ҳақда РИА Новости Россиянинг Мехикодаги элчихонасига таянган ҳолда хабар қилмоқда.
«Улар Nordwind компанияси рейсида учиб келган, маҳаллий миграция хизмати сафар мақсади эълон қилинганига мос келмаслигини аниқлади», - дея хабар беришган элчихонадан.
Дипломатлар Россия паспортига эга фуқароларнинг киритилмагани бўйича аниқ сабабларни ўрганишмоқда.
Сўнгги кунларда бу Россиядан келиб, Мексика ҳукумати томонидан Канкун аэропортида шаҳар ҳудудига киритилмаган иккинчи гуруҳ экани айтилади. Аввалроқ, чегарачилар ўн кишини ушлаб қолишганди.
Миграция хизмати аниқлашича, уч нафар россияликнинг асл мақсади сайёҳликка мос келмаган. Элчихонадан қайд этишларича, бундай ҳолат келувчилар меҳмонхона бронланганини тасдиқлай олмагани, ортга қайтиш чипталарини кўрсатмагани ёки мамлакатда қолиш учун етарли пул маблағлари мавжудлигини исботлай олмагани туфайли юз берган бўлиши мумкин.
Уч киши «қора рўйхат»да, уларга мамлакатга киришга тақиқ қўйилган. Яна тўрт нафар йўловчи Россия паспортига эга, аммо Ўзбекистондан келган. Миграция хизмати фикрича, уларнинг паспорти сохта бўлиб чиқиши эҳтимоли бор.
Ҳозирда дастлабки гуруҳнинг ўн йўловчисидан тўққиз нафари Россияга қайтариб юборилди. Дипломатлар янги сайёҳлар гуруҳининг киритилмагани бўйича вазият билан шуғулланмоқда.