20 йиллик кун-фу машғулоти устознинг кафтларини 8 сантиметрга етказди

Хитойлик жанг санъати устаси Чжан Лунсян қадимий «Темир қум кафт» («Iron Sand Palm») кун-фу техникасини 20 йилдан ортиқ вақт давомида машқ қилиб келади. 53 ёшли устознинг кафтлари одатий катта ёшли эркакникига нисбатан анча қалин бўлиб, ўнг кафт ўлчами 8 сантиметрга етган. Унинг ғайриоддий қўллари кўп йиллик машғулотлар ва машаққатли тайёргарлик натижаси ҳисобланади.

Чжан Лунсян ёшлигидан кун-фуга катта қизиқиш билдирган. Бироқ унинг ҳаётидаги муҳим бурилиш 1998 йилда юз берган. Ўша йили у «Темир кафт» техникаси билан шуғулланадиган устоз билан учрашиб, айнан шу жанг санъатини ҳаёти давомида ўрганишга қарор қилган. Кўп йиллик меҳнат ва мунтазам машқлардан сўнг Чжаннинг ўзи ҳам ушбу қадимий усулнинг моҳир устасига айланган.

«Темир қум кафт» техникаси қандай ўрганилади?"Темир қум кафт« Шаолин жанг санъатидаги машҳур жисмоний тайёргарлик усулларидан бири сифатида тилга олинади. Унда қаттиқ жисмоний машқлар, қўл билан турли абразив материалларга зарба бериш ва кафтларни босқичма-босқич чиниқтириш каби усуллар қўлланади. Ушбу машғулотлар суяклар зичлиги, пайлар мустаҳкамлиги, оғриққа чидамлилик ва зарба кучини оширишга қаратилган.

Бироқ йиллар давомида бундай машқларни бажариш қўл терисининг қалинлашиши ва қадоқлар пайдо бўлишига ҳам олиб келиши мумкин. Бу ҳолат Чжаннинг кафтлари ва бармоқ бўғимларида яққол кўринади.

Чжан Лунсян „Темир кафт“ техникаси билан танилган кун-фу устаси Ян Синчуан билан учрашганида, унинг катта кафтлари ва ташқи кўринишидаги ўзига хосликка эътибор қаратган. У ҳам шундай натижага эришиб, бошқаларда ҳайрат уйғотишни орзу қилган.

Ушбу санъатни ўрганиш учун Чжан етти йил давомида шуғулланган, кейин эса Ян Синчуаннинг расмий шогирди сифатида яна саккиз йил таълим олган. Машғулотлар баъзан зерикарли ва машаққатли туюлса-да, у ҳар куни мунтазам шуғулланишда давом этган.

Кунига 6000 марта зарба беришга тўғри келган

Чжаннинг айтишича, бу жанг санъатини ўзлаштириш осон бўлмаган. У ҳар куни қум ўрнига майда пўлат шарчалар солинган қопга кафтлари билан минглаб зарбалар берган.