Трамп Ойга қайтишга ва Марсда байроқ ўрнатишга ваъда берди

АҚШ президенти Дональд Трамп АҚШнинг коинотдаги муваффақиятларини ривожлантириб, Ой ва Марсга янги экспедициялар юборишга ваъда берди. Трамп бу ҳақда Вашингтонда 4 июлда АҚШ мустақиллиги кунидаги нутқи давомида айтиб ўтди.  
“Америкаликлар учун иложсиз нарса йўқ. 50 йил аввал бутун дунё темир асабли астронавтлар Ойга қўнгани ва унда буюк Америка байроғини ўрнатганини кузатган. Биз Ойга тез орада қайтмоқчимиз, шундан кўп ўтмай Марсда АҚШ байроғини ўрнатамиз”, деб айтган Трамп.
Май ойида Трамп Ой ва Марсни забт этиш учун NASA коинот агентлигига қўшимча 1,6 млрд доллар ажратишга ваъда берган. 
Америкалик фазогирларнинг Ойга қўниши “Аполлон” коинот дастури доирасида амалга оширилган.
Ойга инсоният тарихидаги илк қўниш 1961 йил 12 сентябрда “Аполлон-11” экспедицияси доирасида юз берган: Ернинг табиий йўлдошига фазогирлар Нил Армстронг ва Базз Олдрин биринчи бўлиб қадам қўйганлар. Ўшанда Армстронг Ойда туриб, ўзининг машҳур иборасини айтган: “Инсон учун кичик қадам, бироқ инсоният учун улкан сакраш”. 
“Аполлон” доирасида америкалик фазогирлар Ойда 6 марта бўлишган, охирги қўниш 1972 йилда амалга оширилган.
Ойга камида яна учта экспедиция жўнатиш режалаштирилган, бироқ NASA бюджети қисқартирилгани сабабли улар амалга ошмай қолган. Ўшандан бери агентлик Ойга фақатгина автоматик тадқиқот қурилмаларинигина жўнатиб келади.