Эрдўған Муҳаммад Мурсий ўлдирилганини айтди

Туркия президенти Ражаб Тоййиб Эрдўған Мисрнинг собиқ президенти Муҳаммад Мурсий суд залида вафот этгандан кейин Миср ҳукуматини судга бермоқчи. Бу ҳақда Anadolu ахборот агентлиги хабар берди. 
“Мурсий ўз ўлими билан ўлмаган, уни ўлдиришган. Мисрнинг демократик сайланган президенти суд залида 20 дақиқа ётган ва унга ҳеч ким ёрдам кўрсатмаган”, деб айтган Эрдўған.
Унинг таъкидлашича, Туркия Мурсий ўлими мавзуси ортидан кузатади ва иш халқаро судларда кўрилиши учун барча чораларни кўради. 
Мурсий 17 июнда Қоҳирада суд залидаги нутқидан кейин юрак хуружидан вафот этган. У 67 ёшда бўлган.
Мурсий 2013 йил 3 июлдаги ҳарбий тўнтарув натижасида президент лавозимидан четлатилган. У жосуслик иши бўйича айбдор сифатида ўтган. 2015 йилда Мурсий ва унинг 16 тарафдори ўлим жазосига маҳкум қилинган, бироқ кейинчалик ушбу жазо умрбод қамоқ жазосига ўзгартирилган. Мурсий томони бу ҳукм устидан шикоят қилган, бироқ 2017 йилда Миср ҳакамлик суди ушбу ҳукмни кучда қолдирган.