Нидерландия полицияси MH17 иши бўйича гумондорларни ҳибсга олиш учун халқаро ордер берди

Қўшма тергов гуруҳи 2014 йил июлда Украинада Boeing самолёти ҳалокатига алоқадорликда гумонланаётганларни ҳибсга олиш учун халқаро ордер берди. Бу ҳақда Нидерландия миллий полиция раҳбари Вилберт Паулиссен маълум қилди.
"Уларни ҳибсга олиш учун халқаро ордер берилди", - деди у. 
Терговчилар гумондор сифатида россиялик Игорь Гиркин, Сергей Дубинский ва Олег Пулатов ҳамда украиналик Леонид Харченколар исмларини келтирган.
Ушбу ҳалокатни ўрганиш учун тузилган тергов гуруҳи таркибидан Австралия, Бельгия, Малайзия, Нидерландия ва Украина вакиллари жой олган.
Malaysia Airlines’нинг Амстердамдан Куала-Лумпурга MH17 рейси бўйича йўналаётган самолёти 2014 йил ёзда Украинанинг Донецк вилоятида ҳалокатга учраган. Унинг бортида бўлган 298 кишининг барчаси ҳалок бўлган.