Швециядаги маҳаллий ҳокимият биноси узра СССР байроғи кўтарилди

17 июнь куни Швециянинг Тэбю коммунасидаги муниципалитет биноси узра собиқ иттифоқ байроғи ҳилпираб тургани аниқланди. Бу ҳақда Expressen нашри хабар берди. 
Маҳаллий ҳокимият ходими байроқни аниқлаб, уни дарҳол тушириб олган. Байроқни ким кўтаргани номаълумлигича қолмоқда, ваҳоланки бинога киришга фақатгина коммуна ишчилари рухсатга эга бўлган.
“Бунинг учун калит керак, шу сабабли биз бу қандай юз берганини аниқлашимиз лозим. Кўринишича, бу тунги вақт юз берган, бироқ ҳозирча ҳеч нарсани билмаймиз”, деб айтган муниципалитет вакили Густав Сандман.
Таъкидланишича, айни вақтда бино узра яна коммуна байроғи ҳилпираб турибди, воқеа ҳақида эса полицияга хабар берилган.