Трамп кейинги ҳафтадан АҚШдан миллионлаб ноқонуний мигрантлар депортация қилинишини эълон қилди

АҚШ иммиграция ва божхона полицияси кейинги ҳафтадан миллионлаб ноқонуний мигрантларни депортация қила бошлайди. Бу ҳақда АҚШ президенти Дональд Трамп твиттерда маълум қилди.
“Кейинги ҳафтадан АҚШ иммиграция ва божхона полицияси АҚШга ноқонуний келган миллионлаб ноқонуний мигрантларни депортация қилиш жараёнини бошлайди. Улар қандай келган бўлсалар, шундай тез чиқарилиб юбориладилар”, деб ёзган Трамп. 
АҚШ президенти Гватемаланинг учинчи давлатлар фуқароларига бошпана бериш ҳақидаги келишувни имзолашга тайёрлигини маълум қилган. Бу келишув мигрантлар томонидан улар кирган биринчи давлатда бошпана олинишини кўзда тутади.
Оқ уй эгаси, шунингдек, Мексика томонидан иммиграция қонунлари қатъийлаштирилганини қутлаган. Вашингтон 7 июнда тузган келишувга кўра, Мексика АҚШга ноқонуний миграциянинг олдини олиш учун чоралар кўради. Бунинг учун Мексика жанубий чегарасида миллий гвардия бўлинмаларини жойлаштиради ҳамда одам савдоси билан шуғулланувчи ташкилотларга қарши курашади.
Бундан ташқари, Трамп демократларни миграцияни назорат қилиш масаласида ҳаракатсизликда айблаган. У навбатдаги марта демократларни мамлакатнинг иммиграция ислоҳотларига овоз беришга чақирган. “Агар бу юз берса, чегара инқирози тугайди!”, деб таъкидлаб ўтган АҚШ етакчиси.