Ҳонгконгда намойишчилар ғалаба қозонди - ҳукумат Хитойга экстрадиция ҳақидаги қонунни бекор қилди

Ҳонгконг ҳукумати давомли норозилик акцияларига сабаб бўлган Хитой халқ республикасининг жиноятга қўл уришда гумонланган шахсларни экстрадиция қилиш бўйича сўровларини қондириш юзасидан Ҳонгконг Қонунчилик кенгаши томонидан тайёрланаётган қонун лойиҳасини тўхтатди.
South China Morning Post нашри маълумотига кўра, Ҳонгконг маъмурияти раҳбари Кэрри Лэм экстрадиция тўғрисидаги тузатишларни кўриб чиқиш номаълум муддатга тўхтатилганини эълон қилган.

Янги тузатишлар экстрадиция бўйича келишув бўлмаган давлатларга ҳам, жумладан Хитойнинг материк қисмига, жиноятларда гумонланган шахсларни топширишни кўзда тутарди. Бу ўзгаришга қарши чиққанлар, агар бу қонун қабул  қилинса, бу расмий Пекин сиёсатидан норози бўлган фаолларга ҳам нисбатан қўлланиши ва кўплаб бегуноҳ кишилар Хитойга олиб кетилиб, қийноқларга солинишидан хавфсирашганди.
Сўнгги бир неча кун мобайнида ҳонгконгликлар намойишлар уюштиришди, юз минглаб кишилар кўчаларга чиқди. Бу мамлакат тарихидаги энг йирик намойишларга айланди. Намойишчилар ҳукумат биноларини ўраб олишди ва полиция билан тўқнашувлар келиб чиқди.


1841 йилдан 1997 йилга қадар Буюк Британия мустамлакаси бўлган Ҳонгконг «бир мамлакат, икки тизим» тамойили асосида Хитойдан мустақил қонунчилик ва иқтисодий тизим ҳамда ўз валютасига эга. Шунингдек, Ҳонгконг фуқароларининг маълум ҳуқуқ ва эркинликлари, жумладан, сўз эркинлиги ва митинглар ўтказиш ҳуқуқи кафолатланган.