Оқ уй Эрон Венесуэлада ўрнашиб олишга уринаётганини билдирди

Венесуэла йирик уран захираларига эга бўлганлиги боис Эрон бу мамлакатда ўрнашиб олишга уринмоқда. АҚШ президентининг миллий хавфсизлик бўйича маслаҳатчиси Жон Болтон ана шундай фикр билдирди.
"Венесуэла Канададан кейин иккинчи ўринда дунёдаги энг йирик уран захираларига эга. Бу уни бугунги кунда Венесуэлада ҳаракат қилаётган Эрон учун асосий мақсадга айлантиради", - деди Болтон.
У шунингдек, Россия ва Хитойни Венесуэладаги инқирозли вазиятдан фойда олишда айблади.
Эслатиб ўтамиз, 23 январда мамлакат пойтахти Каракас шаҳрида бўлиб ўтган митинг чоғида Венесуэланинг президент Мадурога мухолиф парламенти етакчиси Хуан Гуайдо ўзини муваққат президент деб эълон қилган эди.
АҚШ, Канада, шунингдек, Европа ва Лотин Америкасининг бир қатор давлатлари Гуайдони мамлакатнинг легитим президенти сифатида тан олишган. Россия, Туркия ва Хитой Мадурони қўллаб келишмоқда.