Рухсат берилмаганига қарамай, Тошкентда "Ўлмас полк" тадбири ўтказилди

Россияда ташкиллаштирилган ва кейинги йилларда бошқа мамлакатларда ҳам оммалашиб бораётган "Ўлмас полк" хотира тадбири 9 май куни Тошкентда ҳам ўтказилди. Шаҳар ҳокимияти бу акциянинг ўтказилишига рухсат бермаган эса-да¸ юзлаб одам кўксида "Георгий ленталари", айримлар уруш даври ҳарбий кийимларини кийиб Тошкентдаги “Биродарлик қабристони”да тўпланди.
Айни пайтда бир гуруҳ ўзбек зиёлилари Россия элчихонаси ва “Россотрудничесто” ўтказган “Ўлмас полк” акциясига муқобил тарзда совет тузуми қатағони қурбонлари суратларини кўтариб “Биродарлик қабристонида”акция уюштирди.
Тошкентдаги "Биродарлик қабристони"да ўтказилган "Ўлмас полк" тадбирида қанча одам иштирок этгани ҳақида аниқ маълумот йўқ.
Аммо тадбир ташкилотчилари режалаган кўча юриши бўлмаган.
"Ўлмас полк" акцияси ташкилотчилари 9 май куни Тошкентдаги "Биродарлик қабристони"дан Мустақиллик майдонидаги Мангу олов монументигача юришни амалга оширишни режалаштиришган эди.

Тадбир ташкилотчиси ҳисобланган “Россотрудничество” вакилининг Озодликка айтишича, “жамоатчилик тартибини бузмаслик ва шаҳарда ноқулайликлар вужудга келтирмаслик” учун бундай юришдан воз кечилган.
9 май арафасида Тошкент шаҳар ҳокимлиги “Ўлмас полк” акциясига рухсат бермаганини маълум қилди.
Ўзбекистон Адлия вазирлиги эса рухсатсиз йиғилишлар, митинглар, кўча юришлари ёки намойишлар уюштириш ёхуд ўтказиш тартибини бузиш ўн беш суткагача муддатга маъмурий қамоққа олинишига сабаб бўлиши мумкинлигини эслатди.

Самарқандда ҳам юзлаб одам кўксида "Георгий ленталари", айримлар уруш даври ҳарбий кийимларини кийиб, Хотира ва қадрлаш куни ўтказилган тадбирда қатнашди.