Мингбулоқда синов тариқасида илк нефть қазиб олингани хабар қилинди

Ўзбекистон Энергетика вазирлиги Намангандаги Мингбулоқ конида ўтказилган синаш ишлари диорасида илк нефть қазиб олинганини маълум қилди.

Мингбулоқ конида "Ўзбекнефтгаз" ва Хитойнинг SNPC миллий нефть-газ корпорацияси «Бир макон — бир йўл» стратегияси доирасида инвестицион лойиҳани олиб бормоқда.

Расмий маълумотда айтилишича, мазкур лойиҳа Ўзбекистон ва Хитой энергетик ҳамкорлигининг энг йирик намунаси ҳисобланади.

Мингбулоқ туманидаги нефть кони 25 йил аввал кўмиб қўйилган ва 2017 йилнинг июлидан бошлаб бу ерда яна қайта нефт қазиб олиш ҳаракати бошланган эди.

Озодлик радиоси конга яқин ҳудудлар аҳолиси унинг вулқондек портлаб¸ яна катта ëнғинга сабаб бўлишидан хавотир олаётгани тўғрисида ўз вақтида хабар берган эди. Бироқ хитойлик мутахассислар¸ уйма-уй юриб¸ бундай хавфнинг йўқлигини билдирган.

Мингбулоқда нефть кони очилгани 1992 йил эмарт ойида хабар қилинган эди. Ўшанда қарийб 8000 метр чуқурликдан нефть вулқондек отилиб чиқа бошлаган. Экологик фожеанинг олдини олиш мақсадида кон кўмиб ташланган эди.

Экспертларнинг фикрича, кондаги нефть ўта чуқурликда жойлашгани сабаб уни қазиб олиш жуда мушкул жараён ҳисобланади.