Трамп ўзига қарши олиб борилган терговни давлат тўнтарувига уриниш деб атади

АҚШ президенти Дональд Трамп унинг сайловолди штабининг Россия билан эҳтимолий тил бириктириши бўйича тергов бошлангандан кейин АҚШ давлат тўнтарувига уринишни бошдан кечирганини айтди. Трамп бу ҳақда Техасга ишчи сафари олдидан журналистларга айтиб ўтган.
“Бу қонунга хилоф тергов эди, у ноқонуний бошланган. Бу давлат тўнтарувига уриниш бўлган. Бу президентни лавозимидан четлатишга уриниш бўлган, бироқ биз устун чиқдик”, деб айтган Трамп.
Трампнинг таъкидлашича, у терговни олиб борган махсус прокурор Роберт Мюллернинг доклади тўлиқ матнини ҳали кўрмаган.
“Мен Мюллер докладини кўрмадим. Менга келсак, менинг Мюллер доклади билан умуман ишим йўқ, мен тўлиқ оқландим”, деб қўшимча қилган АҚШ президенти. 
Трамп, шунингдек, унга қарши тергов бошланишининг барча тафсилотларини ўрганиб чиқиш лозимлигини айтган. 
Март охирида Мюллер Россиянинг АҚШдаги 2016 йилги президент сайловларига эҳтимолий аралашуви терговини якунлади. Ушбу тергов бўйича доклад АҚШ бош прокурори Уильям Баррга топширилган. Барр 2 кундан кейин конгресс олдида ҳисобот бериб, конгрессменларни тергов Трамп ва Россия ўртасида “келишув бўлгани” исботини аниқламаганини маълум қилган.