Порошенко Путин билан тасвирланган плакат учун узр сўради

Украина президенти Пётр Порошенко ўзининг “Ёки Порошенко, ёки Путин” деган ташвиқот шиорини омадсиз чиққан деб айтди.    
Порошенко унинг Путин билан бирга тасвирланган Россияга қарши плакатлари президент сайловлари бўйича рақиби Владимир Зеленский билан боғлангани учун украиналиклардан узр сўраган.
“Мен Зеленскийни Путиннинг агенти эканликда айбламаяпман. Агар кимдир буни шундай тушунган бўлса, узр сўрайман”, деб айтган Порошенко ICTV телеканали эфирида. 
Шунингдек, Порошенко Зеленскийни яхши актёр деб атаган.
Аввалроқ “Честно” жамоат ҳаракати таҳлилчиси Игорь Фешенко фейсбукдаги саҳифасида Порошенко сайловларнинг 2-босқичида ўзини Путинга қарши қўяётган реклама суратини жойлаштирган. Унинг таъкидлашича, Порошенконинг ташвиқот палаткаларида ҳам шундай тасвирли газеталар тарқатилмоқда. Бундай плакатларнинг адади 4 млн нусхани ташкил қилади. 
Украинанинг собиқ адлия вазири Елена Лукашнинг айтишича, Порошенко ўз рекламасида Путиннинг тасвиридан фойдаланиши учун аввал унинг розилигини олиши керак эди.