ОАВ Эфиопиядаги Boeing ҳалокатининг янги версиясини маълум қилди

Ethiopian Airlines’нинг Boeing 737 MAX 8 йўловчи лайнери қуш ёки бошқа объект билан тўқнашув натижасида қулаган бўлиши мумкин. Бу ҳақда ABC News авиаҳалокат бўйича суриштирувдан хабардор манбаларга таянган ҳолда хабар қилмоқда.
Уларнинг айтишича, лайнер бегона объект билан тўқнашуви «ҳужум бурчаги» датчигининг бузилишига, бу эса манёвр қилишни тузатиш тизими (MCAS) хато туфайли фаоллаштирилишига олиб келган бўлиши мумкин. Қайд этилишича, Boeing учувчилари самолёт устидан назоратни қайта тиклай олмаган, шу сабабли лайнер ҳалокатга учраган.
MCAS самолёт ҳаддан ташқари юқорига оғиб кетишининг олдини олиш учун мўлжалланган. Унинг ишидаги камчилик ўтган йил октябрида Индонезияда қулаган Boeing ҳалокатининг эҳтимолий сабаби сифатида кўрилганди. Эфиопияда лайнер қулаши ҳам тизимнинг нотўғри ишлаши билан боғлиқ бўлгани айтилади.
Бундан олдин, Индонезиядаги Boeing 737 ҳалокатининг янги тафсилотлари ошкор этилганди.