Янги Зеландиядаги терактлардан кейин ҳукумат аҳолидан қуролларни қайтариб сотиб олмоқчи

Янги Зеландия ҳукумати 14 март куни Крайстчерчдаги иккита масжидга ҳужумлардан кейин ўз фуқароларидан ўқотар қуролни қайтариб сотиб олмоқчи. Қуролни сотиб олиш учун 300 миллион Янги Зеландия доллари (200 млн доллардан кўпроқ) талаб этилиши тахмин қилинмоқда. 
Аввалроқ мамлакат бош вазири Жасинда Ардерн бу мақсадда камроқ пул – 100 млндан 200 млн Янги Зеландия долларигача сарфланиши мумкинлигини айтган. Бироқ унинг ўринбосари Уинстон Питерснинг айтишича, “вазият кутилгандан ёмонроқлигига тайёр туриш” лозим.
1 апрелда мамлакат парламентида ўқотар қуролга эгалик қилиш қоидаларига киритилиши мумкин бўлган ўзгартиришлар тақдим қилинган. Депутатлар бу ўзгартиришларни яқин орада муҳокама қилишади. 
Қонун лойиҳасига кўра, Янги Зеландияда кўплаб яримавтоматик милтиқ турлари тақиқланади, сентябргача эса янги зеландияликлар ўз қуролларини полицияга топширишлари керак бўлади. Фақатгина 22 калибрдаги милтиқларга ҳамда ўқдони 5 та ва ундан камроқ ўққа мўлжалланган қуроллар бундан истисно қилинган. Қонунни бузганлик учун қамоқ жазоси берилиши мумкин: тақиқланган қуролни сақлаганлик учун – 2 йиллик, уни одамга ўқтаганлик учун 7 йилгача қамоқ жазоси. 
Бугунги кунда Янги Зеландияда қуролни интернет орқали сотиб олиш мумкин, исталган фуқаро 16 ёшдан бошлаб махсус лицензия асосида унга эгалик қила олади.
Янги ўзгаришларга қарши ўқотар қурол эгалари уюшмаси аъзолари қарши чиқмоқдалар. Уларнинг таъкидлашича, янги қонун Янги Зеландиянинг 250 минг фуқаросини жиноятчига айлантиради. Бироқ Питерс бу гапларни “сафсата” деб атаган.