Facebook тизимлари Янги Зеландиядаги теракт намойишини видеоўйиндан фарқлай олмаган

Facebook ижтимоий тармоғининг номақбул контентни аниқлаш автоматик тизими Янги Зеландиянинг Крайстчерч шаҳридаги масжидларга қилинган теракт намойишини фарқлаб, тезкорлик билан блоклай олмаган. Бу ҳақда Facebook раҳбариятига иқтибос келтирган ҳолда Associated Press (AP) ахборот агентлиги хабар берди. 
“Видеотрансляциянинг пайдо бўлиши автоматик тизимнинг ишга тушишига олиб келмаган”, деб айтган компания вице-президенти Гай Розен.
AP’нинг таъкидлашича, сунъий онг тизимлари катта ҳажмдаги турли контентда ўргатилади. Бироқ отишмаларнинг видеоёзувлари ижтимоий тармоқларга кам тушиши сабабли Facebook намойишнинг қандай мазмундалигини автоматик тарзда аниқлаб, уни блоклай олмаган. Розеннинг айтишича, тизим ҳақиқий воқеаларни видеоўйиндан фарқлай олмаган.
Масжидга ҳужум қилиниши видеоси катта кечикиш билан блоклангани сабабли, у интернетда тезда тарқалиб кетган. Аввалроқ Facebook’да фожиадан бир кун кейин ҳужум акс этган 1,5 млнтадан кўпроқ видеоёзув ўчириб ташлангани маълум қилинган. Шунингдек, ижтимоий тармоқ маъмурияти отишмани содир этган Брентон Таррантнинг Facebook ва Instagram’да аккаунтларини тезкорлик билан блоклаб қўйган.