Алиев Қорабоғда эгалланган Шушани Озарбойжоннинг маданий пойтахти деб эълон қилди

Озарбойжон президенти Илҳом Алиев Тоғли Қорабоғда эгалланган Шуша шаҳрини Озарбойжоннинг маданий пойтахти деб эълон қилди. 

Ушбу шаҳар 2020 йил 8 ноябрда Озарбойжон қўшинлари назоратига ўтган эди.   
“Мен Шуша шаҳрини Озарбойжоннинг маданий пойтахти деб эълон қиламан. Шуша бунга муносиб. Фикримча, у нафақат Озарбойжоннинг, балки минтақанинг маданий пойтахти деб ҳисобланиши мумкин”, деб айтган Алиев Озарбойжоннинг янги маданият вазири Анора Керимовани қабул қилиш вақтида.  
Озарбойжон раҳбарининг таъкидлашича, Шушада тарихий ва диний ёдгорликлар тикланади. Бу борада ишлар бошлаб юборилган. “У ерга катта гуруҳ жўнатилди. Уйлар, тарихий ёдгорликлар, етказилган зарар ўрганилади ва биз Шушани тиклашни бошлаймиз. Биз шаҳарнинг тарихий қиёфасини тиклашимиз лозим”, деб қўшимча қилган Алиев.
Озарбойжон раҳбари Боку назоратига ўтган Физули шаҳрида халқаро аэропорт қуриш вазифасини топширган. 
“Топшириқ берилди, аэропорт учун жой танланмоқда. Жорий йилда камида учиш-қўниш йўлакчаси тайёр бўлиши лозим. Физулидан Шушагача йўл қисқароқ. Физулида аэропорт қурилиши Шушага хорижий меҳмонларни таклиф қилиш имконини беради”, деб таъкидлаб ўтган Алиев.
У Озарбойжон назоратига ўтган барча ҳудудларда маданий объектлар рўйхатини тузишни буюрган ва уларни бузганларга нисбатан қонуний чоралар кўрилишини айтган.