Россияда 60 ёшдан ошганлар учун «Спутник V» вакцинасидан фойдаланиш маъқулланди

Экспертиза 60 ёшдан ошганлар учун Россиянинг биринчи вакцинаси хавфсиз ва самарадор эканини кўрсатди, мамлакат Соғлиқни сақлаш вазирлиги ушбу фуқаролар гуруҳи учун уни тақиқлаш тўғрисидаги қарорни бекор қилди. Бундан олдин препарат кексаларда синовдан ўтказилди.

Россияда ёши кекса инсонлар учун учун «Спутник V» вакцинасининг хавфсиз экани экспертиза давомида тасдиқланди. Бу ҳақда мамлакат соғлиқни сақлаш вазири Михаил Мурашко «Россия 24» телеканали эфирида айтиб ўтди. 
Мамлакат Соғлиқни сақлаш вазирлиги оммавий эмлаш пайтида 60 ёшдан ошган кишилар учун препаратни қўллаш ҳақида ижобий хулоса берди.
«Спутник V» вакцинасини 60 ёшдан ошганларда қўллаш бўйича клиник тадқиқотлар ўтказилди. Экспертиза унинг хавфсиз ва самарадор эканини тасдиқлади. Соғлиқни сақлаш вазирлиги тиббий мақсадларда фойдаланиш бўйича йўриқномага тузатишлар киритишни маъқуллади», - деди вазир. 
Пайшанба куни вакцинани ишлаб чиққан Гамалея номидаги марказ директори Александр Гинцбург препаратни кекса ёшдаги фуқароларда синовдан ўтказиш ишлари якунланганини хабар қилди. Унинг сўзларига кўра, 60 ёшдан ошган фуқароларни эмлаш тўғрисида қарор яқин кунларда қабул қилиниши мумкин. 
Бунгача у ушбу тоифадаги фуқароларни бевосита эмлаш жараёни келаси йил бошида бошланиши мумкинлиги ҳақида айтиб ўтганди.
Ўтган ҳафта мамлакат президенти Владимир Путин коронавирусга қарши эмланмагани, бунга уни фуқароларнинг ёш тоифаси бўйича қўллаш ҳали тасдиқланмагани сабаб эканини маълум қилганди. «Мутахассисларнинг айтишича, бугунги кунда муомалага чиқарилаётган вакциналар маълум бир ёшдаги фуқароларга мўлжалланган. Вакциналар ҳали мен кабиларга етиб келмади. Шу маънода мен мутахассисларнинг тавсияларига амал қиляпман», - деди Путин. Шу билан бирга, у «имкони борича тезроқ» эмланишини билдирди. Россия президенти ҳозир 68 ёшда. 
Россияда кекса ёшли фуқароларда «Спутник V» вакцинасини синовдан ўтказиш октябр ойи ўрталарида бошланди. Кейинчалик худди шу тадқиқот Новосибирскнинг «Вектор» маркази томонидан ишлаб чиқарилган «ЭпиВакКорона» иккинчи вакцинаси бўйича ўтказилди.