Трампда коронавирус: кислород даражаси пасайиб кетгани учун президентга стероидлар берилмоқда

Якшанба куни АҚШ президенти Дональд Трамп қандай даволанаётгани тафсилотлари маълум бўлди. Президентнинг даволовчи шифокори Шон Конли Трампга дексаметазон стероиди тайинлангани ҳақида хабар қилди. Бу дори одатда касалликнинг оғир шаклини бошдан кечираётган беморларга уларнинг нафас олишида муаммо бўлмаслиги учун берилади.

Дексаметазон президентга шунинг учун тайинланганки, сўнгги кун давомида унинг қонида кислород даражаси икки марта кескин пасайиб кетган.
Доктор Конли Трампга қўшимча кислород қабул қилиш тавсия этилганини айтиб ўтган.
Конлининг сўзларига кўра, президент душанба куниёқ шифохонадан чиқарилиши, у даволанишни Оқ уйда давом эттириши режалаштирилмоқда.

• Дексаметазон бу — ўтган асрнинг 60 йилларидан бери яллиғланишга қарши восита сифатида фойдаланиб келинадиган стероид. У онкологияда ҳам қўлланилади. Ташкилотнинг қайд этишича, ушбу дори воситасининг ижобий таъсири фақат касалликнинг оғир босқичида бўлган беморларда кузатилган.

Трампнинг касаллиги ҳақида асосий маълумотлар

• Шанба куни Трампнинг шифокори президентнинг ҳолати ҳақида «эҳтиёткорона оптимизм» билан фикр билдирганди. У беморнинг хавф остида эмаслигини таъкидлаганди.
• Бу баёнот ортидан касалхона ва Оқ уйдан Трампнинг қачон касаллангани санасини чалкаштириб юборувчи турлича маълумотлар тарқалди.
• Трампни даволовчи шифокорнинг сўзлари шанба куни президент маъмурияти раҳбари Марк Мэдоуз айтган сўзлар билан мос эмасди. Медоуз Трампнинг сўнгги 24 соатдаги ҳолати  «катта хавотир туғдиргани», кейинги 48 соат ҳал қилувчи палла бўлиши ҳақида гапирди. У президентга ташхис қўйилганидан кейин унинг аҳволи кескин ёмонлашгани, ҳарорати кўтарилиб, қондаги кислород миқдори кескин тушиб кетгани ҳақида қўшимча қилди.
• Якшанба куни Трамп видеомурожаат қилиб, ўзини нисбатан яхшироқ ҳис қилаётгани ҳақида гапирди.

«Пандемиянинг охири кўриниб қолди»
BBC’нинг Оқ уйдаги корреспонденти Тара Маккелви
Кўп ойлар давомида Дональд Трамп ва унинг атрофидагилар ҳеч қачон тиббий ниқоб тақишмади ва худди ҳеч қандай пандемия йўқдек ҳаракат қилишди. Кейин президентга ташхис қўйилди ва Трампнинг тарафдорлари дунёси кескин ўзгарди.
Жума куни президент твиттери орқали коронавирусга чалингач Оқ уйда бесаранжомлик бошланди.
Президентнинг ёрдамчилари ва Оқ уй ходимлари зўр бериб тартибни сақлаб қолишга уринишди, аммо умумий муҳит кўпроқ хаосга ўхшаб кетмоқда. Хавотирланиш, ҳайқириқ ва бироз йиғи ҳам бўлди.
Президент ўтган вақт давомида АҚШ соғлиқни сақлаш соҳасидаги вазият ҳақида оптимизм билан гапириб келди - худди у шу йўл билан пандемияни енгмоқчидек эди. Америкада 200 мингдан ортиқ киши коронавирусдан вафот этди, аммо Трамп яқиндагина вазият назорат остида эканини айтганди.
Хайрия тадбирлари учун олдиндан тайёрлаб қўйилган ва пайшанба куни эълон қилинган мурожаатида у «пандемия якуни яқинлиги» ҳақида гапиради. Шу ҳафта бошида президентлик дебатида эса у демократлар номзоди Жо Байденни ҳамиша ниқоб тақиб юргани учун мазах қилганди.
Президентнинг вирус ҳақидаги гаплари кўплаб америкаликларни ғазаблантириб келади. Сўнгги вақтларда унинг ёрдамчилари ва маслаҳатчилари ҳам вирус ҳақидаги баёнотларида эҳтиётсизлик қила бошлашди. Улар худди коронавирусдан холи дунёда яшаётгандек эди. Оқ уйда ниқоб тақувчилар жуда кам эди, ҳеч ким тушлик вақтида ижтимоий масофа сақлашга риоя этмасди. Улар президент қароргоҳидаги хиёбонда ўтказиладиган маросимларга юзлаб меҳмонларни таклиф этишарди.
Президент маъмурияти президент билан кўришадиганларни тезкор Covid-19 дан ўтказишларини айтишади. Аммо экспертлар тезкор тестларнинг ишончлигига шубҳа билдиришган ва бу амалдорларда хавфсизлик ҳақида ёлғон таассурот уйғотишини айтишган.
Энди президент касалланди, унинг ёрдамчилари офисларига бостириб келган ҳақиқий хавф қаршисида қолишди.
Мен президентнинг баёнотлари унинг тарафдорларига қандай таъсир қилиши ва улар соғлиқни сақлаш соҳасидаги вазиятни қандай ўнглаётганидан ҳайратланишини биламан («Усиз яна миллионлаб кишилар ҳалок бўларди», деган унинг тарафдорларидан бири).
Аммо президентнинг ўзи касалланиши барча тасаввурларни йўққа чиқарди.
Дуолар ва митинглар
Дональд Трампнинг тарафдорлари шанба куни кечқурун шиорлар ёзилган плакатлар ва гуллар билан АҚШ президенти ётқизилган Миллий ҳарбий-тиббий марказ деворлари олдида йиғила бошлади.
Бутун мамлакат бўйлаб шу каби акциялар ўтказилди.

Трампнинг касалланиши унинг сайловолди кампанияси тақвимига ўзгартириш киритди. Трамп қайта сайланишига умид қилаётган президентлик сайловлари 3 ноябрь кунига белгиланган.

Шифохона атрофида тўпланган Трамп тарафдорлари унинг соғлиги учун дуо қилишмоқда.
Трампнинг тарафдорлари ўз акцияларини ўтказишга ҳаракат қилишди.

Шанба куни республикачилар бутун мамлакат бўйлаб президентни қўллаб-қувватловчи сўзлар билан кўчаларга чиқишди. Калифорнияда «Трамп учун» автоколоннаси ташкил этилди. 
Бошқа штатларда, масалан, Флоридадаги Форт-Лодердейлда катерлар эгалари ҳам ўзига хос колонна ҳосил қилишди.


Қўллаб-қувватлов акцияси Нью-Йоркдаги Стейтен-Айленд туманида ҳам ўтказилди.