“Ҳеч қаерга қочмадим ва қочмоқчи эмасман”. Лукашенко мамлакатдаги вазият, Россия билан муносабатлар ва вагнерчилар ҳақида

Беларусь президенти Александр Лукашенко 8 сентябрь куни Минскда, Мустақиллик саройидаги қароргоҳида Россиянинг «ВГТРК» (Бутунроссия давлат телевизион ва радиоузатув компанияси), Russia Today, «Первый канал» ва «Говорит Москва» радиостанцияси журналистларига катта интервью берди.

Фото: RT
“Мамлакатдаги беқарорлик ташқаридан бошқарилмоқда”
Беларусь президенти мамлакатдаги сўнгги воқеалар ташқи кучларнинг таъсири остида юз бераётганини таъкидлади.
“Мамлакатда ҳеч қандай беқарорлик йўқ ва агарда ташқи омил бўлмаганида мана бу воқеалар ҳам бўлмасди. Ташқи омил деганда биринчи навбатда ташқаридан бошқарувни назарда тутяпман. Биз ҳам, россияликлар ҳам ким ва қаердан туриб бошқараётганини биламиз: америкаликлар Варшава яқинидаги марказдан Telegram-каналлар орқали. Иккинчи марказ — бу Чехия. Кейин эса Литва ва афсуски, Беларусга таъсир ўтказиш учун Украинада ҳам таянч пунктлари тузишмоқда”, деди Лукашенко.
“Мен қўрқоқ эмасман ва қўрқмайман”
Журналистлар Александр Лукашенкодан намойишлар  бўлаётган вақтда нима учун қўлида автомат билан чиққанлиги ҳақида сўрашди. У бунга қўрқоқ эмаслигини намойиш қилиш учун шундай қилганини айтди.
“Яъни фарзандларим, мамлакатим шу ерда эканлигини ва бу мамлакатни қандай бўлмасин ҳимоя қилишимни кўрсатдим. Оёқ-қўлларимдан ушлаб ташқарига чиқмаслигимни, снайпер бўлиши мумкинлигини айтишди. "Йўқ, чиқишим керак" дедим. 
Яъни асосийси — мен қўрқоқ эмасман ва қўрқмайман. Яъни ҳеч қаерга қочиб кетмадим ва қочмоқчи эмасман. Фарзандларим ҳам ҳеч қаерга кетмайди”.
“Бир мамлакатга боғланиб қолиш мумкин эмас”
Александр Лукашенко Россия билан маҳсулотлар экспорти масаласига ҳам тўхталди.
Бугунги экспортимизнинг 47—48 фоизини Россия бозори ташкил этади. Иттифоқ парчаланган вақтда 85 фоиз эди. Бу менинг ишим. Мен мақсадли равишда бозорларни диверсификация қилдим. Сизлар мени юз ўгирди деб танқид қилдингиз. Менинг ўрнимда бўлганингизда... Битта нуқтага, битта мамлакатга боғланиб қолиб бўлмайди. У сендан юз ўгириш мумкинлиги учун эмас. Йўқ. Сен 85 фоиз маҳсулот етказиб бераётган нуқтада беқарорлик бўлиб қолиши мумкинлиги учун. Шу заҳоти чилпарчин бўласан. Шунинг учун диверсификация қилдим. Хитойга. Бугун маҳсулотимизни дунёнинг 130 давлатига сотамиз. Бу яхши. Аммо асосий бозоримиз, 48 фоиз атрофида — бу Россия Федерацияси”.
Вагнерчилар ҳақида: “Улар Беларусга нима учун келишганини ҳалигача билолмадим”
Лукашенко Беларусда қўлга олиниб, сўнгра Россияга қайтарилган 33 нафар россиялик тўғрисида батафсил гапирди. У россияликларнинг мамлакатга кириб келишидан тортиб то қўлга олингунига қадар барча тафсилотлардан хабардор бўлиб турганини, уларни Россияга топширишга ўзи бош-қош бўлганини таъкидлади.
“Агарда уларнинг Беларусда ноқонуний ҳаракатларни амалга ошириш учун келмаганликларига ишонч ҳосил қилганимда эди... Буни ҳалигача билмайман. Уларга инсоний муносабатда бўлдим, аммо бизга нима учун келишганини билмайман. Агар сизлар айтгандек, Украина, америкаликлар ва ҳоказоларга ишонадиган бўлсак – ишонишга кўпроқ мойилман, аммо 100 фоиз эмас”, деб қўшиб қўйди у.