Францияда ҳоҳлаганлар коронавирусга бепул тест топшириши мумкин

Франция соғлиқни сақлаш вазири Оливье Веран мамлакатда коронавирус юқтирганлар сони кўпайиб бораётганидан хавотирда эканини билдириб, тест топширишни хоҳлаган барча учун харажатларни давлат ўз зиммасига олишини айтди. Бу ҳақда вазир La Parisien нашрига берган интервьюсида айтган.
«Ҳозирча иккинчи тўлқин ҳақида гапиришга эртадир, лекин охирги кунларда зарарланиш ҳолатлари юқори бўляпти. Ваҳоланки 13 ҳафта давомида кунлик ўсиш пасайиб борганди. Ҳозир вирус юқтираётганлар дастлабки тўлқиндагига қараганда ёшроқ. Аломатсиз кечаётган ҳолатлар жуда кўп.
Шанба куни имзо қўйган ҳужжатимга кўра, энди ҳар қандай суғуртаси бор фуқаро врач тавсиясиз ва ҳеч қандай аломатларсиз ҳам ПЦР-тестдан ўтиши мумкин», дейди вазир.
Франция соғлиқни сақлаш вазирининг айтишича, мамлакатда ҳар ҳафтада 500 мингдан кўпроқ тест ўтказилиб, улардан 1-1,5 фоизи мусбат натижа бермоқда. 80 фоиз тест натижалари уч кунда чиқмоқда. Вазир касалланганлар сони ошиб бораётганига сабаб сифатида кўпчилик чет элга кетиш учун тестдан ўтаётганини келтирди. Самолётга чиқиш учун коронавирусга тест топшириш мажбурий.
Айни дамда Францияда 180 мингдан ортиқ одам коронавирус юқтирган. Вирус 30 мингдан ортиқ францияликнинг ўлимига олиб келган. 80 мингдан ортиқ бемор тузалган. Францияда охирги уч кунда касалланиш ҳолатлари 1000 нафар атрофида бўлмоқда.