ЖССТ Covid-19’га чалинган оғир беморларни дексаметазон билан даволаш самара келтирганини олқишлади

Тадқиқотчиларнинг маълум қилишича, у коронавирусга чалинган беморларнинг организмига етадиган зарарни камайтиради. Даволаш курси ўн кунга мўлжалланган.

Фото: Reuters
Жаҳон соғлиқни сақлаш ташкилоти Оксфорд университетининг шамоллашга қарши мўлжалланган дексаметазон дориси коронавирус инфекциясининг оғир ҳолатларини даволашда ёрдам бериши борасидаги тадқиқоти натижаларини олқишлади.
Тадқиқотчиларнинг сўзларига кўра, дексаметазон ўпкани сунъий нафас олдириш қурилмасига уланган беморларнинг ўлим кўрсаткичини 35, кислородли даволанишдаги беморларнинг ўлимини эса 20 фоизга камайтиради.  
ЖССТ бош директори Тедрос Адханом Гебрейесус бу оғир аҳволдаги беморларда ўлим кўрсаткичини пасайтирувчи илк даволаш схемаси эканлигини қайд этди.
Дексаметазон 60-йиллардан бери маълум, у кўплаб мамлакатларда мавжуд, дейилади ЖССТ томонидан. Буюк Британияда бу дорининг бир қутиси 5 фунт туради.
Тадқиқотчиларнинг маълум қилишича, у коронавирусга чалинган беморларнинг организмига етадиган зарарни камайтиради. Даволаш курси ўн кунга мўлжалланган.
Тадқиқот давомида 2000 беморга ушбу дори берилган. Уларнинг ҳолати дексаметазон қабул қилмаган 4000 беморнинг ҳолати билан солиштирилган.