Туркия 10 июндан бошлаб 40та давлат, жумладан Ўзбекистон билан авиақатновларни тиклайди

Анқара биринчи босқичда 15 мамлакат билан авиақатновларни тиклаш бўйича дастлабки келишувга эришган.

Туркия 10 июндан бошлаб 40та мамлакат билан авиақатновларни тиклайди. Бу ҳақда мамлакат транспорт ва инфраструктура вазири Одил Караисмаилоглу маълум қилди.
"Халқаро авиарейслар шу ойдан бошланади, 40та мамлакат билан рейслар тикланади. 10 июндан Болгария, Қатар, Греция, Баҳрайн ва Шимолий Кипрга парвозлар бошланади", - дея унинг сўзларини келтирмоқда NTV телеканали.
Вазирнинг сўзларига кўра, Анқара биринчи босқичда 15 мамлакат билан авиақатновларни тиклаш бўйича дастлабки келишувга эришган.
"Ҳозирда Шимолий Кипр, Австрия, Литва, Сербия, Қозоғистон, Албания, Беларусь, БАА, Молдова, Ўзбекистон, Украина, Марокаш, Иордания, Судан ва Италия билан келишувга эришдик", - деди Караисмаилоглу.
Туркияда 1 июндан ички парвозлар тикланганди. Turkish Airlines авиакомпанияси 18 июндан Европага халқаро рейслар бошланишини эълон қилди.
Мамлакатда коронавирус тарқалишига қарши кураш доирасида март охирида халқаро ва ички авиақатновлар тўхтатилганди. Туркияда коронавирус юқтирганлар сони 166 мингдан зиёд бўлиб, 4609 киши вафот этган, 130852 киши соғайган.