Оқ уйнинг 11 президент хизматида бўлган собиқ ходими коронавирусдан вафот этди

АҚШда Оқ уйнинг собиқ бош хизматкори, 92 ёшли Уилсон Рузвельт Жерман коронавирусдан вафот этди. Жерман Оқ уйда 11 президент вақтида ишлаган. 

Фото: Getty Images
Бу ҳақда марҳум оиласига таяниб NBC телеканали хабар берди.
Жерман Оқ уйда президент Дуайт Эйзенхауэр вақтида 1957 йилдан фаррош бўлиб ишлашни бошлаган. 1960-йиллар бошида президент Жон Кеннеди вақтида у бош хизматкор даражасигача кўтарилган. Бунга биринчи хоним Жаклин Кеннеди ташаббусчи бўлган. Кеннеди хоним Жерманга ўз фарзандларини ишонган ва у билан яхши муносабатларда бўлган.
Жерман, шунингдек, Бушлар оиласи аъзолари билан ҳам яхши муносабатларда бўлган. У Барак Обама маъмурияти вақтида 2012 йил пенсияга кетган.
АҚШнинг собиқ биринчи хоними Хиллари Клинтоннинг таъкидлашича, Жерман президентларни Оқ уйда ўзларини худди ўз уйларидек ҳис қилишларини таъминлаган.
Собиқ президент Кичик Жорж Бушнинг айтишича, у рафиқаси билан бирга Оқ уйда эрталаблари биринчи бўлиб кўрадиган одамлари Жерман бўлган. “У ажойиб инсон эди”, деб эслаган марҳумни собиқ президент.