Собянин Москвада коронавирусга чалинганлар 300 мингга яқинлашганини айтди. Ниқоб ва қўлқоп тақиш мажбурий этиб белгиланмоқда

Собяниннинг сўзларига кўра, Москвада коронавирусга чалинганлар аҳолининг 2-2,5 фоизини ёки 300 мингни ташкил этади.

Фото: РИА Новости
Москвадаги жамоат транспорти йўловчилари 12 майдан ниқоб ва қўлқоп тақишлари шарт. Бу ҳақда «Россия 24» телеканали эфирида шаҳар мэри Сергей Собянин маълум қилди.
«Кўплаб одамларга ишлаш имкониятини берар эканмиз, транспортда ҳаракатланишлар сони кўпаяди, бир-бири билан мулоқот қилувчилар сони ошади. Шу сабабли метрополитенда ўз ўзини изоляция қилишнинг қўшимча режимини киритмоқдамиз, жамоат транспортида ниқоб ва қўлқоп тақиш қатъий талаб этиб қўйилади», — деди Собянин.
Собяниннинг сўзларига кўра, Москвада коронавирусга чалинганлар аҳолининг 2-2,5 фоизини ёки 300 мингни ташкил этади. У бу ерда гап расмий статистикадаги аниқланган ҳолатлар ҳақида эмас, балки "ҳақиқий беморлар" тўғрисида кетаётганини таъкидлади.
Россия оператив штабининг берган маълумотларига кўра эса Москвада коронавирус юқтирганлар сони 92,6 мингтани ташкил этади. Россия бўйича ушбу касалликни юқтирганлар сони 177 мингта.
Россия бу кўрсаткич бўйича жаҳон рейтингида Германия (168 162 ҳолат ва 7275 ўлим) ва Францияни (174 191 ҳолат ва 25809 ўлим) ортда қолдирган ҳолда юқори бешликка кирди.