Путин Ким Чен Инни медаль билан тақдирлади

Россия президенти Владимир Путин ўз фармони билан Шимолий Корея етакчиси Ким Чен Инни Иккинчи жаҳон урушидаги ғалабанинг 75 йиллигига аталган юбилей медаль билан тақдирлади.

Фото: CNN
Бу ҳақда Россиянинг Шимолий Кореядаги элчихонаси Facebook’даги саҳифасида маълум қилди.
Таъкидланишича, Ким Чен Ин “1941-1945 йиллардаги Улуғ Ватан урушидаги Ғалабанинг 75 йиллиги” медали билан Шимолий Корея ҳудудида ҳалок бўлган ва дафн этилган собиқ иттифоқ фуқароларининг хотирасини абадийлаштиришга қўшган ҳиссаси ва собиқ иттифоқ жангчилари кўмилган жойлар ва уларга ўрнатилган ёдгорликлар муҳофазасида кўрсатилган ғамхўрлик учун тақдирланган.

Таъкидланишича, медални Россиянинг Шимолий Кореядаги элчиси Александр Мацегора Шимолий Корея ташқи ишлар вазири Ли Сон Гвонга топширган.
Ким Чен Иннинг Россияга илк ташрифи 2019 йил апрелида бўлиб ўтганди. Ташриф вақтида Владимир Путин Ким Чен Ин билан Владивостокда учрашган. Ўшанда икки етакчи матбуот учун ёпиқ режимда 2 соатдан кўпроқ суҳбатлашган. 
Охирги кунларда Ким Чен Ин омма олдида кўринмай қўйгандан кейин унинг соғлиғи ёмонлашгани ва ҳаттоки вафот этган бўлиши мумкинлиги ҳақида миш-мишлар пайдо бўлганди. Бироқ 1 май куни унинг Сунчхон шаҳрида ўғитлар ишлаб чиқарувчи завод очилишида иштирок этгани суратлари пайдо бўлган. Суратларда у соғлом ва қувноқ кўринишда бўлган.