Эрон ташқи ишлар вазири Трампни «тиббий террорчилик»да айблади

Эрон ташқи ишлар вазири Муҳаммад Жавод Зариф АҚШ президенти Дональд Трампнинг Эронга қарши санкциялари коронавирус эпидемияси ортида тиббий террорчиликнинг бир тури ҳисобланишини айтди.
“Дональд Трамп фуқароларимиз коронавирусдан ҳалок бўлаётган бир пайтда Эроннинг касалликка қарши курашиш учун зарур бўлган захираларини ориқлатиш мақсадида ноқонуний санкцияларни атайлаб кучайтирмоқда”, деб ёзган Зариф твиттерда.
У дунё АҚШнинг “иқтисодий террорчилиги тиббий террорчиликка ўзгараётгани”га бошқа жим қараб тура олмаслигини айтган.   
Охирги маълумотларга кўра, Эронда коронавирусга чалинганлар сони 5823 нафарга, ундан вафот этганлар сони 145 нафарга етган.