Коронавирус: Вашингтонда фавқулодда ҳолат, АҚШ ва Австралияда илк қурбонлар

АҚШнинг Вашингтон штати губернатор Жей Инсли коронавирус тарқалиши ва АҚШда ундан илк ўлим ҳолати қайд этилгани сабабли штат ҳудудида фавқулодда ҳолат режими киритилишини эълон қилди.

Фото: REUTERS
Бу ҳақда губернатор сайтида маълум қилинган.
Инсли, шунингдек, давлат муассасалари ва департаментларига коронавирус тарқалишига қарши давлат ресурсларини қўллаш ва барча имкони бор чорани кўришни буюрган. Бундан ташқари, режим вирусга қарши курашда штат миллий гвардиясини жалб қилишни кўзда тутади.    
Айнан Вашингтонда коронавирусдан АҚШдаги илк ўлим қайд этилди. Таъкидланишича, ундан 60 ёшли аёл вафот этган. Мамлакатда 29 февралга кўра, 62 киши коронавирусга чалинган. 
Шунингдек, Австралияда ҳам коронавирусдан илк ўлим ҳолати қайд этилди. Ундан Diamond Princess кемасида бўлган 78 ёшли эркак вафот этган. Эркак ва унинг 79 ёшли рафиқаси бир ҳафтача аввал коронавирус тарқалиши қайд этилган кемадан эвакуация қилинган. 
Айни вақтда “яшил қитъа”да коронавирусга чалинган 25 киши аниқланган.
Бу орада Арманистонда коронавирусдан касалланган биринчи киши аниқланди. Бу ҳақда мамлакат бош вазири Никол Пашинян Facebook’да маълум қилди.    
Таъкидланишича, бемор 28 февралда Эрондан рафиқаси билан келган 29 ёшли эркакдир. 
Охирги маълумотларга кўра, Хитойда коронавирусга чалинганлар сони 79824 нафарга етди, улардан 2870 киши вафот этган. 41,6 минг киши соғайиб кетган.
Охирги суткада бутун мамлакат бўйлаб 573 та янги касалланиш ҳолати қайд этилган, 35 киши вафот этган.