Авиаҳалокат компания айби билан юз бергани айтилди

ЎТГАН йилнинг 27 декабрида Алмати шаҳри яқинида «Бек Эйр» компаниясига қарашли «Фоккер 70/100» йўловчи учоғи ҳалокатга учраб, 13 киши ҳалок бўлгани 52 йўловчи турли даражада жароҳат олгани маълум қилинган эди.
Ҳалокат сабабларини ўрганиш бўйича тузилган ҳукумат комиссияси илк хулосаларни жамоатчиликка маълум қилди. Экспертларнинг таъкидлашича, ҳаво кемасининг қулаб тушишига компания учоқни парвоз олдидан мажбурий кўрикдан ўтказмагани сабаб бўлган.
Бундан ташқари, “Bek Air” раҳбарияти учувчиларга тегишли ҳужжатларни сохталаштиргани маълум бўлди. «Фоккер 70/100» ҳаво кемасини бошқариш бўйича Латвияда таълим олган компаниянинг икки нафар учувчиси имтиҳонларни топшира олмаган ва натижада уларга учувчилик ҳуқуқини берувчи махсус ҳужжат эмас, курсда таълим олгани хусусида сертификат берилган. Учувчилар эса мутасадди идорага ўқув курсини муваффақиятли тугатганликлари ҳақидаги сохта ҳужжатни тақдим этганлар.
Шунингдек, «Фоккер 70/100» учоғида 25 декбар куни парвоз вақтида носозлик кузатилган ва учувчи бу ҳақда компанияни хабардор қилган бўлсада, нуқсонни тўлиқ бартараф этиш чоралари кўрилмаган.
“Bek Air” ширкати авиация двигателлари ишлаб чиқарувчи “Rolls Royce” компанияси билан ҳамкорлик борасида шартномага эга бўлмаган ва двигателларнинг эксплуатация маълумотлари инглиз ширкатига етказиб турилмаган. Шунинг билан бирга жуда кўплаб, техник камчиликларга йўл қўйилган. Мисол учун, учоқдаги айрим қисмларни бирлаштиришда оддий скотчдан фойдаланилган, двигателдан мой оққан, шиналарнинг фойдаланиш муддати эса буткул ўтиб кетган.