Трамп Суриядаги нефтни АҚШ ўзи хоҳлаганидек тасарруф қилишини айтди

АҚШ ИШИД террорчи гуруҳини енгиш учун Суриядаги нефть конлари устидан назорат ўрнатди ва эндиликда бу нефтни ўзи хоҳлаганидек тасарруф қилиши мумкин. Бу ҳақда АҚШ президенти Дональд Трамп НАТО бош котиби Йенс Столтенберг билан учрашувидан сўнг айтди.
"ИШИД нефть устидан назоратни сақлашга уринганди: энди эса биз тўлиқ назорат қилмоқдамиз. Очиғини айтганда, биз кўплаб турли инсонларнинг қўллаб-қувватлашидан фойдаланмоқдамиз. Бу ҳудудда ҳарбийларимиз нефтни қўриқлаш учунгина қолган. Нефть бизда ва биз уни истаганимиздек тасарруф этишимиз мумкин", - деди Трамп.
Аввалроқ АҚШ Сурия шимоли-шарқидаги Румейлан туманидаги нефть конлари яқинига жанговар техникасини жойлаштирганди.