Нурсултонда Сурия бўйича музокаралар бўлиб ўтади

Нурсултонда Сурия бўйича бўлиб ўтадиган музокараларга БМТ, Иордания, Ливан ва Ироқ вакиллари кузатувчилар сифатида таклиф этилди. Бу ҳақда Қозоғистон ташқи ишлар вазирлиги матбуот хизмати раҳбари Ойбек Смадияров маълум қилди.
Унинг маълумот беришича, Сурия бўйича 14-халқаро учрашув 10-11 декабрь кунлари бўлиб ўтади.
"Унда кафил давлатлар: Эрон, Россия ва Туркия, Сурия ҳукумати ва Сурия қуролли мухолифати делегациялари иштирок этиши режалаштирилган. Кузатувчилар сифатида БМТ, Иордания, Ливан ва Ироқнинг юқори даражадаги вакиллари қатнашади", - деди Смадияров.
Унинг сўзларига кўра, Нурсултондаги учрашув кун тартибига Суриядаги сиёсий жараёнларни тезлаштириш масаласи киритилган.