Францияда зилзиладан кейин атом электр станцияси бир ойга тўхтатилди

Франция жанубида 11 ноябрда юз берган зилзиладан кейин Крюа атом электр станциясининг учта реактори бир ойга тўхтатиб қўйилди. Улар декабрнинг биринчи ярмидагина ишга туширилади. Бу ҳақда Франция энергетик оператори EDF маълум қилди. 
“EDF реакторлар ишлашини секин-аста тиклайди”, дейилган компания баёнотида.
Таъкидланишича, текширувнинг дастлабки натижаларига кўра реакторларда зилзила вақтида ҳеч қандай шикастлар аниқланмаган. Бироқ қўшимча профилактика тадбирлари ўтказилиши талаб этилади. Шу сабабли АЭСнинг 2-, 3- ва 4-реактори иши тўхтатилган. 
11 ноябрда Францияда 5,4 магнитудали зилзила юз берганди. Зилзила кучи Лион, Монпелье, Авиньон, Сент-Этьен, Гренобль, Марсель шаҳарларида бир неча сония давомида сезилиб турган.