Tesla Европада илк заводини қуради

АҚШнинг Tesla компанияси Берлинда Европадаги илк заводини қуради. Бу ҳақда компания раҳбари Илон Маск “Олтин рул 2019” танлови ғолибларини тақдирлаш маросимида маълум қилди. Ушбу танлов Bild am Sonntag ва Auto Bild нашрлари томонидан ўтказилиб келинади.

Tesla компанияси танловда Model 3 модели учун мукофотга лойиқ топилган.
Маскнинг твиттерда маълум қилишича, Берлиндаги Gigafactory 4 деб номланадиган завод аккумуляторлар, электродвигателлар ва Model Y ҳамда Model 3 электромобиллари ишлаб чиқаради. 
Шунингдек, Берлинда компаниянинг муҳандислик ва дизайнерлик марказлари жойлашади.
Gigafactory 4 АҚШ компаниясининг умумий ҳисобда тўртинчи ва АҚШдан ташқаридаги иккинчи заводи бўлади. Gigafactory 1 Невадада, Gigafactory 2 Буффалода, Gigafactory 3 эса Шанхайда қурилган.
Германиядаги завод Tesla’га Европада электромобиллар сотишини енгиллаштириши мўлжалланмоқда.