39 жасад топилган юк машина ҳайдовчисига айблов эълон қилинди. Англиядаги фожианинг янги тафсилотлари

Англиянинг Эссекс графлиги ҳудудида ичида 39 кишининг жасади чиққан юк машинаси ҳайдовчиси - Шимолий Ирландия фуқароси бўлган 25 ёшли Мо Робинсонга қасддан содир этилмаган қотиллик бўйича айблов эълон қилинди.

Полиция чоршанба куни Англия шарқидаги Эссекс графлигининг Грейс шаҳарчасидаги саноат зонасида турган юк машинаси ичидан 31 эркак ва 8 аёлнинг жасадини топганди.
Шимолий ирландиялик ҳайдовчи, 25 ёшли Морис Робинсон 28 октябрда «39 кишини қасддан содир этилмаган ўлдириш, одам савдоси мақсадида тил бириктириш, ноқонуний иммиграция ва пул ювишга кўмаклашиш айблови» билан судда жавоб беришни бошлайди. 

Ушбу қотиллик иши юзасидан жами 5 киши қўлга олинган. Жума куни Уоррингтон шаҳрида одам савдоси жиноятида гумон қилинган икки киши (38 ёшли эркак ва аёл), шунингдек, Шимолий Ирландиядан 48 ёшли эркак ушланган.
RTE телерадиокомпанияси 26 октябрда полициячилар Дублинда ушбу ҳодиса бўйича яна бир гумонланувчи – 20 ёшли йигитни ушлашганини маълум қилган.
Бундан аввалроқ Би-би-си юк машинасида ҳалок бўлганлар ичида Вьетнам фуқаролари ҳам бўлгани ҳақида хабар тарқатди. Марҳумларнинг қариндошлари журналистлар билан боғланиб, вьетнамликлар юк машинаси юкхонасида жўнатилгани ҳақида хабар қилишган.
«Жуда афсусдаман, жуда афсусдаман, ойи ва дада, менинг бошқа мамлакатга сафарим омадсизлик билан якунланмоқда. Мен ўляпман, нафас ололмаяпман. Мен сизларни жуда севаман», - дея ёзган 26 ёшли Фам Тхи Ча Ми. 
Қизнинг акаси Би-би-си мухбирига у контрабандачиларга Британияга олиб бориши учун 30 минг фунт тўлагани ҳақида айтиб берган.
Вьетнам нашрлари тахминан Эссексдаги воқеадан кейин 20 нафар атрофидаги вьетнамликни яқинлари топа олишмаётгани ҳақида хабар тарқатди. «Бедарак йўқолганларнинг ёши 18дан 45гача. Биз полицияга фотосуратларни жўнатганмиз», - дея ёзилган VietHome сайтида.
Вьетнамнинг Лондондаги элчихонаси воқеалар ривожини кузатиб бораётгани ва Британия ҳукумати билан доимий алоқада бўлиб турганини маълум қилган.
ОАВнинг ёзишича, 31 эркак ва 8 аёлнинг ўлимига музлатгич-фурада музлаб қолишлари сабаб бўлган. Жасадлар топилган фуранинг ичидаги ҳарорат минус 25 даража бўлган.