АҚШнинг Украинадаги элчиси Трампга қарши кўрсатма берди

АҚШнинг Украинадаги элчиси лавозимини бажарувчи Уильям Тейлор АҚШ конгрессида АҚШ президентига қарши импичмент жараёнида кўрсатма берди. Бу ҳақда The Washington Post нашри хабар берди. 
Тейлорнинг таъкидлашича, АҚШнинг собиқ вице-президенти Жо Байденнинг ўғли Хантер ишлаган Burisma компаниясига нисбатан тергов ўтказилиши Трампнинг украиналик ҳамкасби Владимир Зеленский билан учрашишининг шарти бўлган. АҚШ элчисининг маълум қилишича, Трамп Зеленскийдан тергов бораётгани ҳақида баёнот беришни талаб қилган. Бундан ташқари, Украина президенти CNN телеканалига интервью бериб, керакли гапларни айтиши кўзда тутилган. Тейлорнинг таъкидлашича, акс ҳолда Трамп Киевга молиявий ёрдам ажратишни тўхтатиш билан таҳдид қилган.  
Шунингдек, АҚШнинг Украинадаги махсус элчиси Курт Волкер, Европа Иттифоқидаги элчиси Гордон Сондленд, энергетика вазири Рик Перри ва Трампнинг адвокати Руди Жулиани “АҚШнинг Украинадаги сиёсатининг норасмий канали”нинг бир қисми бўлган.
АҚШ конгресси қуйи палатаси Трампга қарши импичмент жараёнини 25 сентябрда бошлаганди. Бунга Трампнинг Зеленский билан июлдаги телефон орқали суҳбати сабаб бўлган: Демократик партия аъзолари Трамп Хантер Байденга қарши коррупция иши бўйича тергов бошлаш учун Зеленскийга босим ўтказганини исботлашмоқчи. 
Байденлар атрофидаги можаро ОАВда Хантер Байден 2014 йил баҳоридан 2015 йил кузигача Burisma Holdings украин компаниясидан миллионлаб доллар олгани ҳақидаги мақолалар пайдо бўлгандан кейин авж олган. Ўша вақтда унинг отаси Жо Байден АҚШнинг Украина бўйича махсус вакили бўлган.