АҚШ сенаторлари Туркия ва Россияга қарши санкциялар тўғрисидаги қонун лойиҳасини тайёрлади

Халқаро муносабатлар бўйича қўмита сенаторлари Жим Риш ва Роберт Менендес Сурия шимолига бостириб киргани учун Туркияга нисбатан санкциялар кўзда тутилган қонун лойиҳаси тайёрланганини маълум қилди.
Сенаторлар шунингдек, Суриядаги “зарарли ҳаракатлари” учун Россияга қарши янги санкциялар киритилишини талаб қилмоқда.  
Қонун лойиҳаси Туркияга қурол сотилишини чеклаш ва турк амалдорлари ҳамда Суриядаги турк ҳарбийларига қурол етказиб бераётганларга нисбатан санкциялар жорий этилишини кўзда тутади.
Бундан ташқари, сенаторлар Туркиянинг НАТОга аъзолиги масаласини кўтаришмоқда.
Пайшанба куни АҚШ вице-президенти Майк Пенс АҚШ ва Туркия Сурия шимолида ўт очишни вақтинча тўхтатиш тўғрисида келишувга эришганини маълум қилганди.