Туркияда сўнгги 3 кун ичида 400га яқин шахс ҳибсга олинди

Туркияда Курдистон ишчилар партияси (PKK/KCK) ва ИШИДга қарши ўтказилаётган операциялар давомида сўнгги уч кун ичида 391 киши қўлга олинди. Бу ҳақда Туркия ички ишлар вазирлигига таяниб, Anadolu агентлиги хабар берди.
Вазирлик маълумотига кўра, мамлакатнинг 36та провинциясида Курдистон ишчилар партиясига (Туркияда террорчилик ташкилоти деб топилган) қарши ўтказилган 63та тезкор амалиёт вақтида 245 киши ушланган.
Шунингдек, 25та провинцияни қамраб олган 44та операция давомида 146 киши ИШИДга алоқадорликда гумонланиб ҳибсга олинган.
Қўшимча қилинишича, антитеррор амалиётлари давом этмоқда.
Душанба кунининг ўзида пойтахт Анқарада 10 киши ИШИДга қарши кураш доирасида ушланган. Қўлга олинганларнинг қайси мамлакат фуқароси эканига аниқлик киритилмаяпти, аммо улар Туркияга ноқонуний киргани ва террорчилик гуруҳининг фаол аъзоси бўлгани айтиляпти.
Daily Sabah`нинг ёзишича, ҳибс қилинганлар мамлакатдан депорт қилиниши кутилмоқда.
Расмий маълумотларга кўра, сўнгги бир неча йил давомида Туркия ҳудудида ИШИДга қарши олиб борилган ҳаракатлар натижасида камида 2 минг киши ушланган, яна 7 минг нафар шахс мамлакатдан чиқариб юборилган. Бундан ташқари, террорчилик гуруҳларига алоқадорликда гумон қилинган 70 минг киши Туркияга киритилмаган.
Туркияда ИШИД томонидан ташкиллаштирилган деб ҳисобланувчи қўпорувчилик ҳаракатлари натижасида 300дан ортиқ киши ҳалок бўлгани айтилади.