NYT: Вашингтон Туркиядаги базасидан ядровий қуролларни олиб чиқиб кетиш имкониятини кўриб чиқди

АҚШ маъмурияти Анқара Сурияда ҳарбий операция бошлаши муносабати билан Туркиядаги Инжирлик базасидан ядровий қуролларни олиб чиқиб кетиш имкониятини кўриб чиқди. Бу ҳақда The New York Times газетаси хабар берди.
Нашр манбаларининг сўзларига кўра, "Давлат департаменти ва энергетика вазирлиги ходимлари Инжирлик базасида анчадан буён сақланаётган 50 бирликка яқин тактик ядровий қуролни олиб чиқиб кетиш режасини кўриб чиққан". Нашр манбаларидан бирининг фикрига кўра, ушбу қуролларнинг базадан олиб чиқиб кетилиши "амалда Туркия ва АҚШ ўртасидаги иттифоқнинг тугаганини билдиради".  
Нашрнинг эътибор қаратишича, Туркия президенти Ражаб Таййип Эрдўған бир ойча аввал Анқарада ядровий қурол йўқлигидан норозилигини билдирган.